ވ. ކެޔޮދޫގައި އަންނަ އަހަރު ޑޮލަރު އޭޓީއެމްގެ ޚިދުމަތް ފައްޓަވާދެއްވާނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވައިފިއެވެ.

މިއަދު ހެނދުނު ކެޔޮދޫއަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވާ ދެއްކެވި ވާހަކަފުޅައި އެމަނިކުފާނު ވިދާޅުވީ ކެޔޮދޫއަކީ ލޯކަލް ޓޫރިޒަމްވެސް ވަރަށް ފުޅާ ރަށެއް ކަމަށާއި އެ ރަށުގައި ވަރަށް ގިނަ މީހުން އެ ވިޔަފާރި ކުރާ ކަމަށެވެ. އަދި ރައީސް ވަނީ އެކަމަށްޓަކައި އެ ރަށުގެ ވިޔަފާރިވެރިންނަށް މަރުހަބާ ދަންނަވާފަ އެވެ.

ރައީސް ވިދާޅުވީ، ލޯކަލް ޓޫރިޒަމް ވިޔަފާރި ފުޅާކުރުމަށްޓަކައި ސަރުކާރުން އެކިކަހަލަ ލޯން ސްކީމްތައް ވެސް ތައާރަފްކުރުމަށް އެމަނިކުފާނުގެ ސިޔާސަތުގައި ހިމަނާފައިވާނެ ކަމަށެވެ.

“އެހެންވީމަ މިރަށުގައި ލޯކަލް ޓޫރިޒަމް އިތުރަށް އިތުރަށް ކުރިއެރުވުމަށްޓަކައި އަންނަ އަހަރުގެ މާރިޗް މަހުގެ ކުރިން ޑޮލަރު އޭޓީއެމްއެއް ބަހައްޓައިދޭނެ ކަމުގެ ޔަގީންކަން ދެން،” ރައީސް ވިދާޅުވިއެވެ.

އަތޮޅު ތެރޭގައި އެންމެ ފުރަތަމަ ޑޮލަރު އޭޓީއެމެއް ގާއިމްކުރީ ވެސް މި ސަރުކާރުންނެވެ. އެއީ ކ. މާފުއްޓެވެ. މާފުށީގެ އިތުރުން އައްޑޫ ސިޓީގެ ހިތަދޫގައި ވެސް ވަނީ ޑޮލަރު އޭޓީއެމްގެ ހިދުމަތް ފަށާފަ އެވެ.

މީގެއިތުރުން އއ. ރަސްދު އާއި ތޮއްޑު އާއި އުކުޅަހުގައި ވެސް މިދިޔަ މަހުގެ ތެރޭގައި ވަނީ ޑޮލަރު އޭޓީއެމްގެ ހިދުމަތް ފަށާފައެވެ.

މިކަމުގެ ސަބަބުން އެ ރަށްރަށުގެ ވިޔަފާރިވެރިންނަށް ބޮޑެތި ލުއިފަސޭހަތަކެއް ވަނީ ލިބިފައެވެ.