ފ. މަގޫދޫގެ އެއަރޕޯޓުގެ މަސައްކަތް ހުއްޓާލުމަށް ނިންމާފައިނުވާކަމަށް ރައީސުލްޖުމްހޫރިއްޔާގެ އޮފީހުން ރަސްމީކޮށް އަންގައިފިއެވެ.
މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ޢާންމު ރައްޔިތަކު ހުށަހެޅި ސުވާލަކަށް ޖަވާބު ދެމުން، ރައީސް އޮފީހުން ސާފުކޮށްދީފައިވަނީ ފ. މަގޫދޫގައި ތަރައްޤީކުރަމުންދާ އެއަރޕޯޓުގެ މަސައްކަތް ހުއްޓާލުމަށް ކެބިނެޓުން ނިންމާފައިނުވާ ކަމަށެވެ.
މި މަޝްރޫޢުއަކީ ކުރީގެ ސަރުކާރުން ފ. ނިލަންދޫގައި ތަރައްޤީކުރަން ނިންމާފައިވާ އެއަރޕޯޓު، ފ. މަގޫދޫއަށް ބަދަލުކޮށްގެން ކުރިއަށްގެންދާ މަޝްރޫޢުއެކެވެ. މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ، ޑރ. ޢަބްދުﷲ މުއްތަލިބު ވިދާޅުވެފައިވަނީ، މި ނިންމުމަކީ އެންމެ އެކަށީގެންވާ ނިންމުމެއް ނޫންކަމުގައި ވިޔަސް، މަޝްރޫޢު ކުރިއަށްގެންގޮސް ނިންމާނެ ކަމަށެވެ.
މިނިސްޓަރ އިތުރަށް ފާހަގަކުރެއްވި ގޮތުގައި، މި މަޝްރޫޢުގައި ލަސްތަކެއް ހުރިކަން ފާހަގަކުރެވިފައިވެއެވެ. އެހެންނަމަވެސް، މިހާރު ޝޯ ޕްރޮޓެކްޝަންގެ މަސައްކަތްތައް ކުރިއަށްދާކަމަށާއި، ސަރުކާރުގެ އަމާޒަކީ މި މަޝްރޫޢު އަވަހަށް ނިންމައި ޚިދުމަތް ފޯރުކޮށްދިނުން ކަމުގައި ވިދާޅުވިއެވެ.
މި މަޝްރޫޢުގެ ދަށުން، 231 މިލިއަން ރުފިޔާގެ އިންވެސްޓްމަންޓަކާއެކު، މަގޫދޫގެ ފަޅުން 30 ހެކްޓަރުގެ ބިން ހިއްކައި، 1800 މީޓަރުގެ ރަންވޭއެއް ހެދުމަށް ވަނީ ރޭވިފައެވެ.
ކިޔުންތެރިންގެ ހިޔާލު