ފ.މަގޫދޫ އެއާޕޯޓަކީ 2022ވަނަ އަހަރު ފެށި މަސައްކަތެކެވެ. ރަށުން 30 ހެކްޓަރުގެ ބިން ހިއްކައިގެން ކުރިއަށްގެންދާ އެ މަސައްކަތުގައި ތަރައްޤީކުރަނީ ޑޮމެސްޓިކް އެއާޕޯޓެކެވެ.
މި މަސައްކަތް ލަސްވެ އޭގެ ޝަކުވާ، މިދިޔަ އަހަރު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެ ރަށަށް ކުރެއްވި ދަތުރުފުޅުގައި ރަށުގެ ރައްޔިތުން ވަރަށް ބޮޑަށް ފާޅުކުރިއެވެ. އެ އަތޮޅު ނިލަންދޫގައި އެއާޕޯޓެއް އެޅުމަށް، މަގޫދޫގެ އެއާޕޯޓްގެ މަސައްކަތް ސަރުކާރުން މުޅިން ހުއްޓާލާފައިވާކަމަށް ދައްކާ ވާހަކައަށް ރައްދުދެއްވައި، މިދިޔަ ސެޕްޓެންބަރު މަހުގެ 21 ވަނަ ދުވަހު ރައީސް ވިދާޅުވީ، މަގޫދޫ އެއާޕޯޓްގެ މަސައްކަތް 1 އަހަރު ދުވަހުގެތެރޭގައި ނިންމާނެކަމުގެ ޔަގީންކަން ދޭކަމަށެވެ.
ބިންހިއްކުމާއި އެއެއާޕޯޓް ތަރައްޤީކުރަނީ އެމްޓީސީސީއާއި ހަވާލުކޮށްގެންނެވެ. މި މަސައްކަތުގެ އެންމެ ފަހުގެ މަޢުލޫމާތު ޙިއްސާކުރައްވަމުން އެމްޓީސީސީން ވިދާޅުވީ މިވަގުތު ކުރިއަށްދާ އެންމެ މުހިންމު މަސައްކަތްތަކަކީ ބިން ހިއްކާ ސަރަޙައްދުގައި ނުނިމުހުރި ވެލި އެޅުމުގެ މަސައްކަތްތައްކަމަށެވެ. ބިން ހިއްކުމުގެ މަސައްކަތް ނިމިފައިވާ ސަރަޙައްދުގައި ބިން ޙިމާޔަތްކުރުމަށް ބޮޑު ހިލަ ޖެހުމުގެ މަސައްކަތްވެސް އެމްޓީސީސީން ވަނީ ކުރިއަށްގެންގޮސްފައެވެ.
މުޅި މަޝްރޫޢުއަށް ބަލާއިރު ޓާމިނަލްގެ %48 މަސައްކަތް ވަނީ ނިމިފައެވެ. އަދި ރަންވޭގެ %58 މަސައްކަތް ވަނީ ނިމިފައެވެ. ތާރު ފަށަލަ އެޅުމުގެ ކުރީގެ އެންމެހާ މަސައްކަތްތައް ވަނީ ނިންމާފައެވެ. މީގެއިތުރަށް، ފަޔަރ ބިލްޑިންގްގެ %67 މަސައްކަތް ވަނީ ނިމިފައެވެ.
މި ހުރިހައި މަސައްކަތެއްގައިވެސް މައި ސްޓްރަކްޗަރގެ މަސައްކަތްތައް ނިމިފަވާއިރު، ބާކީ ހިމެނެނީ އިމާރާތުގެ އެތެރެއަށް ބޭނުންވާ ކަންކަން ފުރިހަމަކުރުމެވެ. މިހާރު ކަނޑައެޅިފަވާގޮތަށް މަސައްކަތްތައް އަވަސްކުރުމަށް އެ ކުންފުނިން ގެންދަނީ މަސައްކަތް ކުރަމުންނެވެ. މި މަސައްކަތުގައި ތަރައްޤީކުރަނީ 15،000 މީޓަރުގެ ރަންވޭއެކެވެ.
1000މީހުންގެ އާބާދީއެއް އޮންނަ މަގޫދޫގައި ތަރައްޤީކުރާ އެއާޕޯޓަކީ 231 މިލިޔަން ރުފިޔާ ޚަރަދުކުރާ މަޝްރޫޢުއެކެވެ.
ކިޔުންތެރިންގެ ހިޔާލު