އެމްޓީސީސީން ކުރިއަށްގެންދާ އެއަރޕޯޓު ތަރައްޤީކުރުމުގެ މަޝްރޫޢުތަކުގެ ތެރެއިން އެންމެ އަވަހަށް މަސައްކަތް ނިމި ޚިދުމަތަށް ގެނެވޭނީ ފ. މަގޫދޫ އެއަރޕޯޓު ކަމަށް އެމްޓީސީސީގެ މެނޭޖިންގ ޑިރެކްޓަރ އަޙްމަދު ސަޢުދީ ވިދާޅުވެއްޖެއެވެ.
“އަހާށޭ ބުނާނަން” ޕްރޮގްރާމްގައި ވާހަކަދައްކަވަމުން ސަޢުދީ ވިދާޅުވީ، މަކުނޫދޫ އެއަރޕޯޓުގެ މަސައްކަތް އަދި ފެށުނީ ކަމަށާއި އަލިފުށީ އެއަރޕޯޓުގެ ރަންވޭ ބޮޑުކުރުމަށް ބިން ހިއްކަންޖެހޭތީ އެ މަސައްކަތް އައު ޑްރެޖަރާއެކު ފެށޭނެ ކަމަށެވެ. ނަމަވެސް މިހާރު މަސައްކަތް ކުރިއަށްދާ ގޮތަށް ބަލާއިރު އެންމެ އަވަހަށް ނިމޭނީ މަގޫދޫ އެއަރޕޯޓުގެ މަސައްކަތް ކަމަށް އޭނާ ފާހަގަކުރެއްވިއެވެ.
މަގޫދޫ އެއަރޕޯޓް މަޝްރޫޢުގެ ބޮޑު އިންސައްތައެއް މިހާރު ވަނީ ނިމިފައެވެ. އެގޮތުން ފަޔަރ ބިލްޑިންގގެ ހުރިހާ މަސައްކަތަކާއި، ޓަރމިނަލް އިމާރާތުގެ ސްޓްރަކްޗަރަލް މަސައްކަތްތައް ވަނީ ނިމިފައެވެ. އަދި ރަންވޭ އަޅާ ސަރަޙައްދު ތައްޔާރުކުރުމުގެ މަސައްކަތްތައްވެސް ވަނީ ފަށާފައެވެ. ސަރުކާރުން 231 މިލިއަން ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫޢުގެ ދަށުން، 30 ހެކްޓަރުގެ ބިން ހިއްކައިގެން 1,500 މީޓަރުގެ ރަންވޭއެއް ތަރައްޤީކުރެއެވެ.
މީގެއިތުރުން، ރަށުގެ ސިނާޢީ އަދި އިޖުތިމާޢީ ބޭނުންތަކަށް ބިން އިތުރުކުރުމާއެކު ޖުމްލަ 48 ހެކްޓަރުގެ ބިން އެމްޓީސީސީން ވަނީ ހިއްކާފައެވެ. މަގޫދޫ އެއަރޕޯޓުގެ ހިންގުން ރީޖަނަލް އެއަރޕޯޓްސް ކޮމްޕެނީ (އާރްއޭސީއެލް) އާ ހަވާލުކޮށްފައިވާއިރު، މި ދައުރުގެ ތެރޭގައި އެއަރޕޯޓުގެ މަސައްކަތް ނިންމައި ޚިދުމަތަށް ދޭން ފަށާނެކަމުގެ ޔަޤީންކަން ސަރުކާރުން ވަނީ ދީފައެވެ.
ކިޔުންތެރިންގެ ހިޔާލު