ސުޕްރީމް ކޯޓުގެ ފަނޑިޔާރުންނަށް ނުފޫޒުފޯރުވީ އެ ކޯޓުގެ ކުރީގެ ފަނޑިޔާރު ހުސްނުއްސުއޫދު ކަމަށް ބަންޑަރަނައިބު އަހްމަދު އުޝާމް ވިދާޅުވެއްޖެއެވެ.
އުޝާމް މިހެން ވިދާޅުވީ “އަހާ” ފޯރަމްގައި ވާހަކަދައްކަވަމުންނެވެ.
އުޝާމް ވިދާޅުވީ ސުޕްރީމް ކޯޓުގެ ފަނޑިޔާރުންނަށް ނުފޫޒު ފޯރުވުމަށް އޭނާގެ ފަރާތުން އެއްވެސް ކަމެއް ކުރައްވާފައި ނުވާނެ ކަމަށެވެ.
“ކުރީގެ ފަނޑިޔާރު ހުސްނުއްސުއޫދަކީ ސިޔާސީ ބޭފުޅެއް. އެ ބޭފުޅާ ސިޔާސީ ވާހަކަ ދައްކަވާނެ. އެކަމަކު އަޅުގަނޑުގެ މިޒާޖު ހުންނަ ގޮތުން އެހެން ދައްކާ ސިޔާސީ ކޮންމެ ވާހަކައަކަށް އަޅުގަނޑުމެން ރެސްޕޮންޑު ނުކުރާތީ ވަރަށް ގިނަ ރައްޔިތުންނަށް ގަބޫލު ކުރެވެނީ ކަންނޭނގެ އެހެންކަން އެހެން ހިނގާފައި އޮތީ،” އޭނާ ވިދާޅުވިއެވެ.
އޭނާ ވިދާޅުވި އެކި މީހުން މެދުވެރިކޮށް ރައީސް ޑރ. މުހައްމަދު މުއިއްޒަށް ސުއޫދު ފޮނުއްވާފައި ހުރި މެސެޖުތަކާއި ރައީސާ ބައްދަލުވެގެން ދެއްކެވި ވާހަކަތަކަށް ބަލާއިރު ނުފޫޒު ފޯރުވާފައި ހުންނަވާނީ ސުއޫދު ކަމަށެވެ.
“ޖުޑިޝަރީއަށް ނުފޫޒު ފޯރުވާފައި ވެސް ހުންނާނީ ވެސް އެ ބޭފުޅާ. ސުޕްރީމް ކޯޓުގެ ފަނޑިޔާރުންނަށް ވެސް ނުފޫޒު ފޯރުވާފައި ވެސް ހުންނާނީ އެ ބޭފުޅާ. އަޅުގަނޑު ހަމަ ވަރަށް ޔަގީންކަމާ އެކު މި ދަންނަވަނީ،” އޭނާ ވިދާޅުވިއެވެ.
އެއްވެސް އިރެއްގައި ތަހުގީގުކޮށްފިނަމަ އެކަމަށް ޖަވާބުދާރީވާން ތައްޔާރު ކަމަށް ވެސް އުޝާމް ވިދާޅުވިއެވެ.
ކިޔުންތެރިންގެ ހިޔާލު