ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ބެލުމަށް ކުރީ ސަރުކާރުން އެކުލަވައިލި “މަރު ކޮމިޝަނު”ގެ ރިޕޯޓުތައް ކުރިއަށް އޮތް މަހެއްހާ ދުވަހުގެ ތެރޭގައި ދިރާސާކޮށް ނިމޭނެކަމަށް ބަންޑާރަނައިބު އަލްއުސްތާޛް އަޙްމަދު އުޝާމް ވިދާޅުވެއްޖެއެވެ.
އެ ކޮމިޝަނަކީ ރައީސުލްޖުމުހޫރިއްޔާއަށް ލިބިދޭ ބާރުގެ ދަށުން 2018ވަނަ އުފެއްދި ކޮމިޝަނެކެވެ، އެ ކޮމިޝަންގެ މަޤްޞަދަކީ 1 ޖަނަވަރީ 2012 އިން ފެށިގެން 17 ނޮވެންބަރު 2018ގެ ނިޔަލަށް ހިނގާފައިވާ، މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތަކުގެ ތެރެއިން، އެކިއެކި ސަބަބުތައް މެދުވެރިވެގެން، އެކަށީގެންވާ މިންވަރަށް ތަޙުޤީޤު ނުކުރެވި ހުރި މައްސަލަތަކުގައި މިނިވަން، މުސްތަޤިއްލު އަދި އިތުބާރު ހިފޭ ތަޙުޤީޤެއްކޮށް، ޙަޤީޤަތް ހޯދުމެވެ. ނަމަވެސް އެ ކޮމިޝަނަށް ނަތީޖާއެއް ނުނެރެވި ވަނީ އުވާލާފައެވެ.
ދައުލަތުގެ އެކި ވުޒާރާތަކުގެ މަސައްކަތްތަކާ ގުޅޭ މައުލޫމާތު ރައްޔިތުންނަށް ފޯރުކޮށްދިނުމަށް ކުރިއަށްގެންދާ “އަހާ” ފޯރަމުގައި އާންމު ރައްޔިތަކު ކުރި ސުވާލަށް ޖަވާބުދެއްވައި ބަންޑާރަނައިބު އަލްއުސްތާޛް އަޙްމަދު އުޝާމް ވިދާޅުވީ ކުރީ ސަރުކާރުން މަރު ކޮމިޝަން އުފެއްދި ނަމަވެސް ވެރިކަން ބަދަލުވެގެން އައިއިރުވެސް އެ ކޮމިޝަނުގެ މައްސަލަތައް ނުނިމޭ ކަމަށެވެ. ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން އެ ކޮމިޝަނުގެ މައްސަލަތައް ނިންމުމަށް 2024 ވަނަ އަހަރުގެ ޖޫން މަހާ ހަމައަށް ފުރުސަތު ދިން ކަމަށާއި އެ މުއްދަތާ ހަމައަށް ބައެއް މައްސަލަތައް ނިންމައި ކޮމިޝަނުގެ ރިޕޯޓުތައް ރައީސަށް ހުށަހަޅުއްވާފައި ކަމަށް ވިދާޅުވިއެވެ.
Advertisementބަންޑާރަނައިބު ވިދާޅުވީ މިހާރު ކުރިއަށްދަނީ އެ ރިޕޯޓުތައް ދިރާސާކުރުމުގެ މަސައްކަތް ކަމަށާއި ކުރިއަށް އޮތް މަހެއްހާ ދުވަހުގެ ތެރޭގައި އެ މަސައްކަތް ނިންމައި، ރައީސުލްޖުމްޙޫރިއްޔާއަށް ލަފާ އަރުވާނެ ކަމަށެވެ. މި ރިޕޯޓުތައް ދިރާސާކުރުމުގައި އާންމު ކުރެވޭނެފަދަ މައުލޫމާތު ހުރި ރިޕޯޓުތައް ދެނެގަނެވޭނެ ކަމަށްވެސް ބަންޑާރަނައިބު ވިދާޅުވިއެވެ.
އަޅުގަނޑުމެންނަށް އާންމު ކުރެވޭނީ ކޮން ރިޕޯޓުތަކެއްތޯވެސް ބެލުމުގެ މަސައްކަތް އަޅުގަނޑުމެން އެބަކުރަން. މީގަ ދިމާވާ މައްސަލައަކީ އެ ރިޕޯޓުތައް އެކުލަވާލާފައި ހުރި ގޮތުން، އެ ރިޕޯޓުތަކަށް މައުލޫމާތު ދީފައި ހުރި ގޮތުން އޭގަ އެބަހުރި ފުލުހުންގެ އިންޓަލިޖެންސް ބައެއް ސިއްރު މައުލޫމާތު ހިމެނޭކަންކަން އެބަހުރި އެ ރިޕޯޓުތަކުގައި. އެއީ ކިހާވަރަކަށް ހާމަކުރެވޭނެ އެއްޗެއްތޯ އެކަން ބަލަމުން އަޅުގަނޑުމެން މިހާރު މިދަނީ.
ބަންޑާރަނައިބު ވިދާޅުވިއެވެ.
ބަންޑާރަނައިބު ވިދާޅުވީ ރިޕޯޓުތައް އާންމު ކުރުމާ ގުޅޭގޮތުން ގޮތް ނިންމަވާނީ ރައީސުލްޖުމްހޫރިއްޔާ ކަމަށެވެ. މަރު ކޮމިޝަނުން ބަލާފައިވާ މައްސަލަތަކުގެ ތެރެއިން ނޫސްވެރިޔާ އަޙްމަދު ރިޟްވާން ޢަބްދުﷲގެ އާއިލާއާ ބައްދަލުކުރައްވައި އެ މައްސަލައާ ގުޅިގެން ހާމަކުރެވެން ހުރި މައުލޫމާތު ފޯރުކޮށްދެއްވާނެ ކަމަށްވެސް ބަންޑާރަނައިބު ވިދާޅުވިއެވެ.
މަރުކޮމިޝަނުން ބެލި މައްސަލަތަކުގެ ތެރޭގައި ނޫސްވެރިޔާ އަހުމަދު ރިޟްވާންގެ މައްސަލައާއި ރަހުމު ކުޑަގޮތަކަށް މަރާލާފައިވާ ބްލޮގަރ ޔާމީން ރަޝީދުގެ މައްސަލައިގެ އިތުރުން ޑރ. އަފްރާޝީމް ޢަލީގެ މަރުގެ މައްސަލަ ހިމެނެއެވެ.
އޭރު ކޮމިޝަން އުފެއްދީ 2 އަހަރު ތެރޭ މަސައްކަތް ނިންމުމަށް ނަމަވެސް އޭރުގެ ސަރުކާރުގެ ދައުރު ނިމިގެން ދިޔައިރުވެސް ކޮމިޝަނުގެ މަސައްކަތް ނިމިފައި ނުވެއެވެ. ކޮމިޝަނުގެ މަސައްކަތް ނުނިމި ދިގުލައިގެން ދިޔައިރު ކޮމިޝަނަށް އެތައް މިލިއަން ރުފިޔާއެއް ވަނީ ޚަރަދުކޮށްފައެވެ.
ކިޔުންތެރިންގެ ހިޔާލު