އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ޓިކްޓޮކްގެ އިސް ވަފްދަކާއެކު ބައްދަލުކޮށް، އެ ޕްލެޓްފޯމް މެދުވެރިކޮށް އާމްދަނީ ހޯދުމުގެ އިތުރު ފުރުޞަތުތަކާ ގުޅޭގޮތުން މަޝްވަރާކޮށްފިއެވެ.
މި ބައްދަލުވުމުގައި، ޑިޖިޓަލް މޮނިޓައިޒޭޝަންގެ އައު މަގުތައް ހުޅުވުމަށް ޓިކްޓޮކާ ގުޅިގެން ކުރެވިދާނެ ކަންކަމާ ބެހޭގޮތުން މަޝްވަރާކުރެވުނެވެ. އަދި ފުރިހަމަ އުފެއްދުންތެރި އިޤްތިޞާދެއް ބިނާކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މެނިފެސްޓޯގައި ހިމެނޭ މުހިންމު ވަޢުދެއްކަން ފާހަގަކުރެވުނެވެ.
ޓިކްޓޮކް މެދުވެރިކޮށް ކޮންޓެންޓް ކްރިއޭޓަރުންނަށް ފައިސާ ލިބޭނެ މަގު ތަނަވަސްވުމުން، ޒުވާނުންނަށް އާމްދަނީ ހޯދުމުގެ އިތުރު ފުރުޞަތުތައް ފަހިވެގެންދާނެކަމަށް އިޤްތިޞާދީ ތަރައްޤީއާ ބެހޭ ވުޒާރާއިން ފާހަގަކުރެއްވިއެވެ. މީގެ އިތުރުން، އެހެނިހެން ސޯޝަލް މީޑިއާ ޕްލެޓްފޯމްތަކުން ފައިސާ ހޯދުމުގެ ގޮތްތަކާއި، ޕޭޕާލް މެދުވެރިކޮށް ފައިސާ ޖަމާކޮށް ނެގުމުގެ ޚިދުމަތް ރާއްޖޭގައި ތަޢާރަފުކުރުމާ ގުޅޭގޮތުންވެސް މަޝްވަރާކުރެވިފައިވެއެވެ.
The TikTok’s senior delegation is with us today in the Maldives. We are working on possible collaboration with this popular global social media network to unlock new avenues for digital monetization. Building a thriving creative economy is a key pledge of President Dr. Muizzu in… pic.twitter.com/37qtSIJQAZ
— Ministry of Economic Development and Trade (@MoEDmv) April 15, 2025
އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެފައިވާ ގޮތުގައި، ރާއްޖޭގައި ގިނަ އަދަދެއްގެ އުފެއްދުންތެރިން ތިބިކަމާއި، ސޯޝަލް މީޑިއާގެ އެކި ޕްލެޓްފޯމްތަކަކީވެސް އާމްދަނީ ހޯދުމުގެ ވަސީލަތްތަކެއްކަން ފާހަގަކުރެއްވިއެވެ. އެހެންނަމަވެސް، ރާއްޖޭގައި މިހާރު އޮތް ނިޒާމުގެ ތެރޭގައި ފަސޭހައިން ފައިސާ ލިބޭނެ ގޮތްތަކެއް ނެތުމަކީ މިކަމުގައި ހުރި ގޮންޖެހުމެއްކަމަށް ވަޒީރު ފާހަގަކުރެއްވިއެވެ.
ޓިކްޓޮކުން ރާއްޖެއަށް އެންމެ ފައިދާހުރި ގޮތް ހޯދުމަށްޓަކައި ރީޖަނަލް އޮފީސްތަކާއެކު މަޝްވަރާކުރަން ފަށާފައިވާކަމާއި، މިކަމުގައި ޗައިނާގެ ސަރުކާރުގެ އެހީތެރިކަމަށްވެސް އެދިފައިވާކަމަށް ވަޒީރު ވިދާޅުވެފައިވެއެވެ.
ކިޔުންތެރިންގެ ހިޔާލު