މާދަމާއަކީ ފިތުރު އީދުގެ ފުރަތަމަ ދުވަސް ކަމަށް ކަނޑައަޅައިފިއެވެ.

ރާއްޖޭގެ ހަނދު ސާބިތުކުރާ ކޮމެޓީގެ ބައްދަލުވުމަށްފަހު އިއްވި ބަޔާނުގައި ބުނީ މިއަދު އޮއްސުމުގެ ފަހުން، ރާއްޖޭގެ އެއްވެސް ރަށަކަށް ޝައްވާލު މަހުގެ ހަނދު ފެނިފައި ނުވި ކަމުގައިވިޔަސް، އިސްލާމީ ބައެއް ގައުމުތަކަށް ޝައްވާލު މަހުގެ ހަނދު ސާބިތުވެއްޖެ ކަމުގެ ހަބަރު ރަސްމީގޮތުން ލިބިފައިވާ ކަމަށެވެ.

“އިސްލާމީ ބައެއް ގައުމުތަކަށް ޝައްވާލު މަހުގެ ހަނދު ސާބިތުވެއްޖެ ކަމުގެ ހަބަރު ރަސްމީގޮތުން ލިބިފައިވާތީ، ރަމަޟާން މަހާއި ޝައްވާލު މަހުގެ ހަނދު ސާބިތުކުރުމަށް ދިވެހިރާއްޖޭގައި އަމަލުކުރުމަށް ހަމަޖެހިފައިވާ އުސޫލުގައިވާ ގޮތުގެ މަތީން، މީލާދީ ސަނަތުން 2025 ވަނަ އަހަރުގެ މި ހިނގާ މާޗް މަހުގެ 30 ވާ އާދީއްތަ ދުވަހަކީ، 1446 ވަނަ އަހަރުގެ ފިތުރު އީދު ދުވަސްކަމުގައި ކަނޑައަޅައިފީމެވެ..،” ބަޔާނުގައި ބުންޏެވެ.

މާދަމާއަކީ ފިތުރު އީދު ދުވަސް ކަމަށް ކަނޑައަޅާފައި މިވަނީ، އެކަމުގެ ބަހުސްތަކެއް ކުރެވެމުންދަނިކޮށެވެ. ކުރީގެ ރައީސް މައުމޫން އަބްދުލްޤައްޔޫމް، މާދަމާއަކީ އީދު ދުވަހަށް ވާނެކަމަށް ލަފާކުރެވޭ ކަމަށް ވިދާޅުވަމުން ގެންދެވި އިރު، ބައެއް ބޭފުޅުން އެކަމާ ހިޔާލުތަފާތުވިއެވެ.