ސްޓެލްކޯގެ ބިލް ދެއްކުމަށް އިތުރު މުއްދަތަށް އެދޭން ބޭނުންވާ ފަރާތްތަކަށް، ކުންފުނީގެ ވެބްސައިޓް މެދުވެރިކޮށް އެކަމަށް އެދެވޭނެ ކަމަށް އެ ކުންފުނީގެ އެމްޑީ ހުސެއިން ފަހުމީ ވިދާޅުވެއްޖެއެވެ.
ސްޓެލްކޯގެ އެމްޑީ ފަހުމީ ސޯޝަލް މީޑިއާ ޕްލެޓްފޯމް “އެކްސް” ގައި ކުރެއްވި ޕޯސްޓެއްގައި ވިދާޅުވީ ސްޓެލްކޯއަކީ ކަސްޓަމަރުންނާ ގާތުން މަސައްކަތްކުރާ، ގައުމަށް އިހުލާސްތެރި އަދި މަސައްކަތުގެ އަހުލާގާއި ސުލޫކު ހިފަހައްޓައިގެން މަސައްކަތްކުރާ މުވައްޒަފުންތަކެއް ތިބި ކުންފުންޏެއް ކަމަށެވެ.
ފަހުމީ އިތުރަށް ވިދާޅުވީ ސްޓެލްކޯއިން ރައްޔިތުންނަށް އޮޅުވާލުމުގެ އެއްވެސް ކަމެއް ނުކުރާނެ ކަމަށާއި، އަބަދުވެސް މަސައްކަތް ކުރަމުން ގެންދަނީ އިހުލާސްތެރިކަމާއެކު ކަމަށެވެ. އަދި ކަސްޓަމަރުންނަށް އެންމެ ލުއިފަސޭހަ ގޮތްތައް ހޯދައިދިނުމަށް މަސައްކަތްކުރާ ކުންފުންޏެއްގެ ގޮތުގައި ސްޓެލްކޯ ދެމިއޮންނާނެ ކަމަށްވެސް އެމަނިކުފާނު ވިދާޅުވިއެވެ.
Advertisement
ބިލް ދެއްކުމަށް އިތުރު މުއްދަތަށް އެދޭން ބޭނުންވާ ފަރާތްތަކަށް stelco.com.mv/rpex މެދުވެރިކޮށް އެކަމަށް އެދެވޭނެކަމަށް ފަހުމީ ވިދާޅުވިއެވެ. އަދި ފަހުމީ ވިދާޅުވީ މިކަމަށް އެދުމުގައި ކުންފުނީގެ އިސްވެރިންނާ ގުޅާކަށް ނުޖެހޭނެ ކަމަށެވެ.
ފަހުމީ މި މައުލޫމާތު ހާމަކުރެއްވީ ރަމަޟާން މަހާއި ޢީދު ކައިރިވެފައިވާތީ، ބިލް ދެއްކުމަށް 30 ދުވަހުގެ މުއްދަތު އިތުރުކޮށްދިނުމަށް އެދި ސޯޝަލް މީޑިއާގައި ކުރި ޕޯސްޓަކަށް ޖަވާބު ދެއްވަމުންނެވެ.
ކިޔުންތެރިންގެ ހިޔާލު