ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ރާއްޖޭގެ ހުރިހާ ގޭބިސީއެއްގައި ސްމާޓް މީޓަރު ހަރުކުރުމުގެ މަސައްކަތް ރަމަޟާން މަހަށްފަހު ފަށާނެކަމަށް އެ ކުންފުނިން ހާމަކޮށްފިއެވެ. މި މަޝްރޫޢަކީ ކަސްޓަމަރުންނަށް ގިނަގުނަ ފަސޭހަތަކެއް ލިބިގެންދާނެ ޕްރޮޖެކްޓެއްކަމަށް ސްޓެލްކޯއިން ފާހަގަކުރެއެވެ.
ސްޓެލްކޯގެ ޖެނެރަލް މެނޭޖަރ އިބްރާހިމް ނާޝިދު ވިދާޅުވި ގޮތުގައި، މި މަހުގެ ތެރޭގައި ސްމާޓް މީޓަރުތައް ރާއްޖެއަށް ގެނެވޭނެއެވެ. އަދި ރަމަޟާން މަހަށްފަހު ގޭބިސީތަކުގައި މީޓަރު ހަރުކުރުމުގެ މަސައްކަތް ފެށޭނެއެވެ. މި ޕްރޮޖެކްޓުގެ ސަބަބުން ކޮންމެ 15 މިނެޓަކުން ކަރަންޓު ބޭނުންކުރެވޭ މިންވަރު ކަސްޓަމަރުންނަށް އަމިއްލައަށް ބެލޭނެއެވެ.
ސްޓެލްކޯގެ އަމާޒަކީ އެއް އަހަރު ދުވަހުގެ ތެރޭގައި މުޅި ރާއްޖޭގެ ހުރިހާ ގޭބިސީއެއްގައި ސްމާޓް މީޓަރު ހަރުކޮށް ނިންމުމެވެ. މި މަޝްރޫޢު ފުރަތަމަ ފެށުމަށް ރޭވިފައިވަނީ ހުޅުމާލޭގައި ނަމަވެސް، އެއްފަހަރާ ގިނަ ސަރަހައްދުތަކެއްގައި މަސައްކަތް ފެށުމަށް ވަނީ ނިންމާފައެވެ.
މި ޕްރޮޖެކްޓަކީ ސްޓެލްކޯއިން މިހާރު ހިންގަމުންދާ އެންމެ ބޮޑު އެއް މަޝްރޫޢު ކަމަށްވެފައި، މީގެ ސަބަބުން ކަސްޓަމަރުންނަށް ލިބޭނެ ފައިދާތައް ވަރަށް ގިނައެވެ. ވުމާއެކު، މި މަޝްރޫޢަކީ ރާއްޖޭގެ ކަރަންޓުގެ ޚިދުމަތަށް އަންނާނެ ބޮޑު ކުރިއެރުމެއް ކަމުގައި ބެލެވެއެވެ.
ކިޔުންތެރިންގެ ހިޔާލު