ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު، ނޭޝަނަލް މެންޓަލް ހެލްތު ސްޓްރެޓީޖިކް އެކްޝަން ޕްލޭން 2025-2029 ރަސްމީކޮށް އިފްތިތާޙުކުރައްވައިފިއެވެ.
މި މުހިންމު ޕްލޭން އިފްތިތާޙުކުރެއްވީ އިއްޔެ ރޭ މިނިސްޓްރީ އޮފް ހެލްތުގައި ބޭއްވުނު ޚާއްޞަ ރަސްމިއްޔާތެއްގައެވެ.
އިފްތިތާޙުކުރެވުނު ނޭޝަނަލް މެންޓަލް ހެލްތު ސްޓްރެޓީޖިކް އެކްޝަން ޕްލޭންގައި، ކުރިއަށް އޮތް ފަސް އަހަރު ދުވަހުގެ ތެރޭގައި ދިވެހިރާއްޖޭގެ ނަފްސާނީ ޞިއްޙަތުގެ ނިޒާމު ހަރުދަނާކުރުމަށްޓަކައި ގިނަގުނަ ފިޔަވަޅުތަކެއް އެޅުމަށް ރޭވިފައިވެއެވެ. މި ޕްލޭންގެ މައިގަނޑު މަޤްޞަދަކީ ނަފްސާނީ ޞިއްޙަތުގެ ޚިދުމަތްތައް ހަރުދަނާކުރުމާއި، ފަރުވާގެ ދާއިރާ ފުޅާކުރުމުގެ އިތުރުން، މުޅި މުޖުތަމަޢުގެ ނަފްސާނީ ދުޅަހެޔޮކަން ކުރިއެރުވުމެވެ.
މި ޕްލޭންގައި އިސްކަންދީފައިވާ ދާއިރާތަކުގެ ތެރޭގައި ހިމެނެނީ:
1. ޕްރައިމަރީ ހެލްތު ކެއަރގެ ތެރެއިން ނަފްސާނީ ޚިދުމަތްތައް ފޯރުކޮށްދިނުމުގެ ނިޒާމު ވަރުގަދަކުރުން
2. ނަފްސާނީ ޞިއްޙަތާ ގުޅޭ ހޭލުންތެރިކަން އިތުރުކޮށް، އެހީތެރިކަން ފޯރުކޮށްދިނުން
3. ނަފްސާނީ ޞިއްޙަތާ ގުޅޭ ސިޔާސަތުތަކާއި، މިންގަނޑުތަކާއި، އުޞޫލުތައް އެކުލަވާލުން
4. ޞިއްޙީ ޚިދުމަތްތެރިންގެ ހުނަރު ތަރައްޤީކުރުން
5. ނަފްސާނީ ބަލިތަކާމެދު އޮންނަ ނޭދެވޭ ވިސްނުން ނައްތާލުމަށް މަސައްކަތްކުރުން
މީގެ އިތުރުން، މި ޕްލޭންގައި އެކި އުމުރުފުރާގެ މީހުންނަށް، ޚާއްޞަކޮށް ކުޑަކުދިންނާއި، އުމުރުން ދުވަސްވީ މީހުންނާއި، އެކިއެކި ނާޒުކު ހާލަތްތަކުގައި ތިބޭ މީހުންގެ ނަފްސާނީ ޞިއްޙަތަށް ޚާއްޞަ ސަމާލުކަމެއް ދިނުމަށް އިސްކަންދީފައިވެއެވެ.
ދުޅަހެޔޮ މުޖުތަމަޢެއް ބިނާކުރުމަށްޓަކައި، ނަފްސާނީ ގޮތުން ބާރުވެރި އަދި ޤާބިލު ރައްޔިތުންތަކެއް އުފެއްދުމަށް، ކަމާގުޅުންހުރި އެންމެހައި ފަރާތްތަކުގެ މެދުގައި އެއްބާރުލުން އިތުރުކުރުމަށްވެސް މި ޕްލޭންގައި ބާރުއަޅާފައިވެއެވެ.
ދިވެހިރާއްޖޭގައި ނަފްސާނީ ޞިއްޙަތު ކުރިއެރުވުމަކީ މި ސަރުކާރުގެ އެންމެ އިސް އަމާޒުތަކުގެ ތެރޭގައި ހިމެނޭ ކަމެއްކަން ފާހަގަކޮށްލެވެއެވެ. ޚާއްޞަކޮށް ރައީސުލްޖުމްހޫރިއްޔާ މިކަމަށް ދެއްވާ އަހައްމިއްޔަތުކަން ފާހަގަކުރެވެއެވެ.
ކިޔުންތެރިންގެ ހިޔާލު