އދ. މަންދޫ ސްކޫލުގައި އަލަށް އިމާރާތްކުރާ 12 ކްލާސްރޫމާއި މަލްޓިޕަސް ހޯލުގެ އިމާރާތްކުރުމުގެ އަމަލީ މަސައްކަތް ފަށައިފިއެވެ.
މި މަޝްރޫޢަކީ ރަށުގެ ތައުލީމީ ދާއިރާގެ ޖާގައިގެ ދަތިކަމަށް ހައްލެއް ހޯދައިދިނުމަށް ސަރުކާރުން ހިންގާ މުހިންމު ތަރައްޤީގެ މަޝްރޫޢެކެވެ. މި މަޝްރޫޢުގެ އަމަލީ މަސައްކަތްތައް ތާވަލާ އެއްގޮތަށް ކުރިއަށްދާއިރު، މިހާރު ކުރިއަށްދަނީ އިމާރާތުގެ ފައުންޑޭޝަން އެޅުމުގެ މަސައްކަތްތަކެވެ.
މި މަޝްރޫޢު ހަލުވިކަމާއެކު ކުރިއަށް ގެންދިއުމަށް ސަރުކާރުން އިސްކަންދެއްވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ފާހަގަކުރައްވާފައެވެ. އެމަނިކުފާނު މަންދޫއަށް ކުރެއްވި ދަތުރުފުޅެއްގައި އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި، ސްކޫލުގެ ޖާގަ އިތުރުކުރުމުގެ މަޝްރޫޢުއަކީ ސަރުކާރުގެ ތަރައްޤީގެ އެޖެންޑާގައި އެންމެ އިސްކަމެއްދޭ އެއް ކަންތައް ކަމުގައި ވިދާޅުވިއެވެ.
މި މަޝްރޫޢު ނިމުމުން މަންދޫ ސްކޫލުގެ ދަރިވަރުންނަށް ކިޔަވައިދިނުމަށާއި އިތުރު ހަރަކާތްތައް ހިންގުމަށް ފަހި ޖާގައެއް ލިބިގެންދާނެއެވެ. އަދި މިއީ ރަށުގެ ތައުލީމީ ފެންވަރު މަތިކުރުމަށް ލިބިގެންދާނެ ބޮޑު ކުރިއެރުމެއްކަމަށް ތައުލީމީ ވުޒާރާއިން ފާހަގަކުރެއެވެ.
ކިޔުންތެރިންގެ ހިޔާލު