މާލޭގެ އަމީނީ މަގު ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން ސެގްމެންޓް އެކެއް އަދި ދޭއްގެ މަސައްކަތް ނިންމައި އެ ސަރަހައްދު އެމްޓީސީސީ އިން އާންމުންނަށް ހުޅުވާލައިފިއެވެ.
މި މަޝްރޫއުގެ ދަށުން ފުރަތަމަ ސެގްމެންޓުގައި ކުރިން އަޅާފައިވާ އޭބީސީ ފަށަލައާއި ތާރު ނެގުމަށްފަހު ދެ ހާސް ހަތް ސަތޭކަ ނުވަދިހަ ހަތަރެއް އަކަމީޓަރުގެ ސަރަހައްދެއްގައި ވަނީ ސަބްގްރޭޑާއި ސަބްބޭސް އަދި އޭބީސީ އެޅުމަށްފަހު ތާރު އަޅާފައެވެ. އަދި ދެވަނަ ސެގްމެންޓުގެ ދަށުން ސަތޭކަ ތިރީސް ތިން އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު އަލުން އޭބީސީއާއި ތާރު އެޅުމުގެ މަސައްކަތް ވަނީ ނިންމާފައެވެ.
އެމްޓީސީސީއިން ބުނި ގޮތުގައި ފުރަތަމަ ދެ ސެގްމެންޓުގެ މަސައްކަތް ނިމުމާއެކު އެ މަޝްރޫއުގެ ދަށުން ދެން ހަމަޖެހިފައިވާ ބައިތަކުގެ މަސައްކަތްތައްވެސް ކުރިއަށްދާނެއެވެ. މިގޮތުން އިއްޒުއްދީން މަގުން ފެށިގެން ކޯރުކެނޑި ހިނގުމާ ހަމައަށް ތަރައްގީކުރާ ތިންވަނަ ސެގްމެންޓުގައި އެއް ހާސް ނުވަސަތޭކަ ސައުވީސް އަކަމީޓަރުގެ ސަރަހައްދެއްގައި އަލުން ތާރުއަޅައި މަގުގެ ނިޝާންތައް ކުރެހުމުގެ މަސައްކަތް ހިމެނެއެވެ.
ކޯރުކެނޑި ހިނގުމުން ފެށިގެން ގިޔާސުއްދީން އިންޓަނޭޝަނަލް ސްކޫލާ ހަމައަށް ހިމެނޭ ހަތަރުވަނަ ސެގްމެންޓުގައި އެއް ހާސް ސަތޭކަ ސާއްވިސް އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު އަލުން ތާރުއަޅައި މަގުގެ ނިޝާންތައް ކުރެހުމަށް ވަނީ ހަމަޖެހިފައެވެ. މީގެ އިތުރުން މަގު ހެދުމުގެ މަސައްކަތަށް މާފަންނު ދަނޑުން ފެށިގެން ހައުސިން މިނިސްޓްރީގެ ކުރީގެ އޮފީހާ ހަމައަށް އޮތް ސަރަހައްދު ބަންދުކޮށް، އެ ސަރަހައްދުގައި ހުރި އުޅަނދުފަހަރު ނެގުމަށް ފުލުހުން ވަނީ އަންގާފައެވެ.
އަލަށް ހުޅުވާލެވުނު ސަރަހައްދާއެކު އަމީނީ މަގު ބޭނުންކުރުމުގައި ކުރިން ދިމާވި ދަތިތަކަށް ބޮޑު ހައްލެއް ލިބި، މަގު ބޭނުންކުރާ ފަރާތްތަކަށް ބޮޑު ލުއިފަސޭހައެއް ލިބޭނެ ކަމަށް އެމްޓީސީސީއިން މައުލޫމާތުދެއެވެ.
ކިޔުންތެރިންގެ ހިޔާލު