ސަރުކާރުން ހިންގާ ތަރައްގީގެ މަޝްރޫއުތައް އަވަސްކުރުމާ ގުޅޭގޮތުންނާއި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ މަސައްކަތްތައް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އަށް ބަދަލުކުރުމުގެ މަސައްކަތާ ބެހޭގޮތުން، އެމްޓީސީސީގެ މެނޭޖިން ޑިރެކްޓަރު އަހުމަދު ސައުދީ، މިނިސްޓަރ އޮފް ފައިނޭންސް އެންޑް ޕަބްލިކް އެންޓަޕްރައިޒަސް ހަސަން ޒަރީރާއެކު މަޝްވަރާ ކުރައްވައިފިއެވެ.
މި ބައްދަލުކުރެއްވުން އޮތީ އެމްޓީސީސީގެ މައި އޮފީހުގައެވެ.
މި ބައްދަލުކުރެއްވުމުގައި ސަރުކާރުގެ ތަރައްގީގެ މަޝްރޫއުތައް ހުއްޓުމެއްނެތި ހިނގުމަށާއި، މަސައްކަތްތައް އަވަސްކުރުމަށް ކުރެވެންހުރި ކަންކަމާ ބެހޭގޮތުން ފުޅާ ދާއިރާއެއްގައި މަޝްވަރާ ކުރެވުނެވެ. މީގެ އިތުރުން އާރްޑީސީގެ ހިންގުމާއި އޮޕަރޭޝަންތައް އެމްޓީސީސީގެ ދަށަށް ބަދަލުކުރުމުގެ މަރުހަލާ އަމާންކަމާއެކު އަދި އެންމެ ފުރިހަމައަށް ކުރިއަށް ގެންދެވޭނެ އިންތިޒާމުތަކާ މެދުވެސް ދެބޭފުޅުން ވާހަކަދެއްކެވިއެވެ.
ސަރުކާރުގެ ކުންފުނިތައް ހަރުދަނާކޮށް، މަޝްރޫއުތައް ހިންގުމުގެ ގާބިލުކަން އިތުރުކުރުމަށް ސަރުކާރުން ދަނީ ގިނަ ފިޔަވަޅުތަކެއް އަޅަމުންނެވެ. އާރްޑީސީގެ މަސައްކަތްތައް އެމްޓީސީސީގެ ދަށަށް ބަދަލުކުރުމަކީ މަޝްރޫއުތައް އަވަސްކޮށް، ޚަރަދު ކުޑަކުރުމުގެ މަގުސަދުގައި ކުރިއަށްގެންދާ މުހިންމު ބަދަލެކެވެ.
ކިޔުންތެރިންގެ ހިޔާލު