މަސްތުވާތަކެތީގެ ދެ މައްސަލައެއް ސާބިތުވެ ދިވެހި ޒުވާނަކު 50 އަހަަރަށް ޖަލަށްލައި ދެލައްކަ ރުފިޔާއިން ޖޫރިމަނާކޮށް ކްރިމިނަލް ކޯޓުން މައްސަލަ ނިންމައިފި އެވެ.
ދިގު މުއްދަތުގެ މި ޖަލު ހުކުމް އައީ ށ. ނޫމަރާ ހަވީރީގެ ޢަބްދުﷲ ފަޞީޙުގެ މައްޗަށެވެ. އޭނާގެ މައްޗަށް އުފުލާފައި ވަނީ ޑައިމޯފިން ޓްރެފިކް ކުރުމުގެ ދައުވާ އާއި ކެނެބިސް ޓްރެފިކް ކުރުމުގެ ދައުވާ އެވެ.
މިއީ 2024 ވަނަ އަހަރު އޭނާ ވީއައިއޭން ފުރަން ގޮސް ހުއްޓާ ސެކިއުރިޓީ ޗެކިންގައި ގައިގައި އެއްޗެއް ހުރި ކަމަށް ބެލެވިގެން ޗެކްކުރުމުން ޑައިމޯފިން އާއި ކެެނެބިސް ފެނުމުން އުުފުލި ދައުވާތަކެކެވެ. އޭނާ ވަނީ ހަށިގަނޑުގައި މަސްތުވާތަކެތި ހުރި ކަމަށް އެއްބަސްވެފަ އެވެ. އެ ތަކެތި އޭނާ ފޮރުވާފައި ފަލަމަސްގަނޑުގައި ޓޭޕު ގަނޑެއް އަޅައިގެންނެވެ.
މި ދެ މައްސަލަ ބެއްލެވުމަށް ފަހު ގާޒީ ނިންމެވި ނިންމެވުމުގައި ވަނީ މި ދެ މައްސަލަ ޝައްކެއް ނެތް މިންވަރަށް ޝަރީއަތަށް ސާބިތުވާ ކަމަށެވެ. އެހެން ކޮންމެ މައްސަލައެއްގައި އުމުރު ދުވަހުގެ ޖަލު ހުކުމެއް އިއްވާ އެއް ލައްކަ ރުފިޔާއިން ޖޫރިމަނާކޮށްފައިވެ އެވެ.
އުމުރު ދުވަހުގެ ޖަލު ހުކުމަކީ 25 އަހަރުގެ މުއްދަތެވެ. އެހެން ކަމުން ދެ މައްސަލާގައި ޖުމްލަ 50 އަހަރުގެ ޖަލު ހުކުމާއި 200،000 ރުފިޔާގެ ޖޫރިމަނާ އެކެވެ. ނަމަވެސް ޖަލުގައި އަހަރެއްހާ ދުވަހު ހުރެފައިވާތީ ދެން ތަންފީޒު ކުރަން ޖެހޭނީ 49 އަހަރުގެ ޖަލު ހުކުމެކެވެ.
ކިޔުންތެރިންގެ ހިޔާލު