އަމީނީ މަގުގައި މަރާމަތުކުރި ސަރަހައްދު އަންނަ އާދިއްތަ ދުވަހު އާންމު ދަތުރުފަތުރަށް ހުޅުވާލާނެކަމަށް ބިނާރާއި ގެދޮރުވެރިކަމާ އުމްރާނީ ތަރައްގީއާ ބެހޭ ވުޒާރާއިން އިއުލާނުކުރައްވައިފިއެވެ.
މި މަޝްރޫއަކީ އަމީނީ މަގުގައި ހަލާކުވެފައިވާ ސަރަހައްދުތައް މަރާމަތުކުރުމަށްޓަކައި އެމްޓީސީސީއާ ހަވާލުކޮށްގެން ކުރިއަށްގެންދާ މަސައްކަތެކެވެ. މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީއާ މި މަސައްކަތް ހަވާލުކޮށްފައިވަނީ ޖޫން މަހުގެ 15 ވަނަ ދުވަހުއެވެ.
އާންމު ދަތުރުފަތުރަށް ހުޅުވާލުމަށް ތައްޔާރުވެފައިވަނީ ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ސަރަހައްދެވެ. މީގެއިތުރުން ދިވެހިރާއްޖޭގެ އަޑު ކުރިމަތިން އޮންނަ ހަތަރުއަނގޮޅި ކަންމަތީގައި ތާރު އެޅުމުގެ މަސައްކަތްވެސް މިހާރު ވަނީ ފުރިހަމަކޮށްފައެވެ.
އެ ސަރަހައްދުތަކުގައި ކުރިން އަޅާފައިވާ ތާރުގަނޑު ނަގައި، މަގުގެ އަޑީގެ ނެޓްވޯކްތައް އަލުން ތަރުތީބުކުރުމުގެ މަސައްކަތް ވަނީ ނިންމާފައެވެ. ތާރު އެޅުމުގެ މަސައްކަތަށްފަހު މިހާރު ކުރިއަށްދަނީ ޓްރެފިކް ނިޝާންތައް ކުރެހުމާއި ފިނިޝިންގެ އެހެނިހެން މަސައްކަތްތަކެވެ.
މި ސަރަހައްދު ހުޅުވާލުމަށްފަހު ދެން ފަށާނީ އިއްޒުއްދީން މަގުން ފެށިގެން ކޯރުކެނޑި ހިނގުމާ ހަމައަށް އޮންނަ ސަރަހައްދުގެ މަރާމަތުގެ މަސައްކަތެވެ. އަމީނީ މަގުގެ މާފަންނާވީ ފަޅި މަރާމަތުކުރަނީ އެ ސަރަހައްދުގެ ތާރުގަނޑު ވަރަށް ބޮޑަށް ހަލާކުވެ، ދުއްވާ އުޅަނދުފަހަރަށް ދަތިތަކާ ކުރިމަތިވަމުންދާތީއެވެ.
މާލޭގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން މާލޭގެ ހުޅަނގުކޮޅުން ބޭރު މަގު ތަރައްގީކުރުމަށްވެސް ވަނީ ތައްޔާރުވެފައެވެ. އެގޮތުން ފެން ހިންދާ ނިޒާމުގެ މަސައްކަތަށް ވެސްޓް ޕާކް ސަރަހައްދުން ބައެއް މިހާރު ވަނީ ބަންދުކޮށްފައެވެ.
ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ ދަށުން ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް އޮތް ސަރަހައްދުގެ މަސައްކަތް މީގެކުރިން ވަނީ ނިންމާފައެވެ. އެއާއެކު އެ ސަރަހައްދުގެ ދަތުރުފަތުރަށް ބޮޑު ލުޔެއް ވަނީ ލިބިގެންގޮސްފައެވެ.
ކިޔުންތެރިންގެ ހިޔާލު