ފަހި ދިރިއުޅުން ކޯޕަރޭޝަންގެ ފްލެޓުތައް ކުއްޔަށް ދިނުމާ ގުޅޭ 16 މައްސަލައެއް ބަލަމުންދާ ކަމަށް އެކުންފުނިން ވިދާޅުވެއްޖެއެވެ.
އެފްޑީސީން ވަނީ އެ ކުންފުނިން ހުޅުމާލޭގައި ތަރައްގީކޮށްފައިވާ ފްލެޓުތަކާ ގުޅިގެން ބަލަމުންދާ މައްސަލަތަކުގެ އަދާހަމަ ހިއްސާކުރައްވާފައެވެ. މި މައްސަލަތަކުގެ ތެރޭގައި ކުނި އެޅުމުގެ ގަވާއިދާ ޚިލާފުވާ މައްސަލަތަކާއި، ހުއްދަނެތި ކުއްޔަށް ދޫކުރުމުގެ މައްސަލަތަކާއި ހުއްދަ ނެތި އެޕާޓްމަންޓަށް ބަދަލު ގެނައުން ފަދަ މައްސަލަތައް ހިމެނެއެވެ.
ފަހި ދިރިއުޅުން ކޯޕަރޭޝަންގެ ދަށުން ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާ 4000 ހައުސިންގ ޔުނިޓުގައި ދިރިއުޅޭ ފަރާތްތަކާއި ގުޅިގެން ހުށައަޅަމުންދާ މައްސަލަތައް އެފްޑީސީން އަންނަނީ ބަލަމުންނެވެ. އެގޮތުން، މިދިޔަ މަހުގެ 21 ވަނަ ދުވަހާ ހަމައަށް އެ ފްލެޓުތަކާ ގުޅޭ 49 މައްސަލަ ހުށަހަޅައި، ބަލަމުން އަންނަ ކަމަށް އެ ކުންފުނިން ވަނީ ވިދާޅުވެފައެވެ.
އެފްޑީސީން ހިއްސާކޮށްފައިވާ ތަފާސްހިސާބުތަކުން ދައްކާ ގޮތުގައި އެކުންފުނިން ބަލަމުންދާ މައްސަލަތަކުގެ ތެރެއިން އެންމެ ގިނައީ ހުއްދަ ނެތި ހައުސިންގ ޔުނިޓުތަކަށް ބަދަލު ގެނައުމުގެ މައްސަލައެވެ. އެގޮތުން، ޔުނިޓުތަކަށް ބަދަލު ގެނައުމުގެ 28 މައްސަލައެއް އެ ކުންފުނިން ބަލަމުން އަންނައިރު އޭގެ ތެރެއިން 5 މައްސަލައެއްގައި ޔުނިޓުގެ ވެރިފަރާތް ވަނީ ޖޫރިމަނާ ކޮށްފައެވެ. ބާކީ ހުރި މައްސަލަތައް ބަލަމުން އަންނަ ކަމަށް އެފްޑީސީން ވިދާޅުވިއެވެ.
ސަރުކާރުގެ ބޯހިޔާވަހިކަމުގެ މަޝްރޫޢެއްގައި ލިބޭ ފްލެޓު ކުއްޔަށް ދޫކުރުމަކީ އާންމުންގެ މެދުގައި ބޮޑު މައްސަލައަކަށްވެފައިވާއިރު ފަހި ފްލެޓުތައް ދޫކޮށްފައިވަނީ ކުއްޔަށްދޭނަމަ ފިޔަވަޅުއަޅާނެކަމުގެ އިންޒާރާއެކުގައެވެ. އެފްޑީސީން ވިދާޅުވީ މި މުއްދަތުގެ ތެރޭގައި ހުއްދަނެތި ކުއްޔަށް ދޫކުރުމުގެ 16 މައްސަލައެއް ބަލަމުންދާކަމަށެވެ. އޭގެތެރެއިން 5 ޔުނިޓެއްގެ ވެރިފަރާތް ޖޫރިމަނާކޮށްފައިވާއިރު 2 ޔުނިޓެއްގެ ވެރިފަރާތަށް ވަނީ ނޯޓިސް ފޮނުވާފައެވެ. މިހާރު ބަލަމުންދަނީ ކުއްޔަށް ދިނުމާ ގުޅޭ 9 މައްސަލައެވެ.
އެފްޑީސީން އާންމުކޮށްފައިވާ ހިސާބުތަކުން ދައްކާގޮތުގައި ގަވާއިދާ ޚިލާފަށް ކުނި އެޅުމުގެ 3 މައްސަލައެއް ވަނީ ފާހަގަކުރެވިފައެވެ. މީގެ ތެރެއިން 2 މައްސަލައެއްގައި ހިމެނޭ ފަރާތްތައް ޖޫރިމަނާކޮށްފައިވާ ކަމަށް އެ ކުންފުނިން ހާމަކުރައްވައެވެ.
މީގެ އިތުރުން އެންގުންތަކަށް ޢަމަލުނުކުރުމުގެ 2 މައްސަލައެއް ބަލަމުން އަންނައިރު އަޑުގަދަވުމުގެ ޝަކުވާއާއި ގުޅިގެން 2 މައްސަލަ ބަލާފައިވާ ކަމަށް އެފްޑީސީން ވިދާޅުވިއެވެ.
އެފްޑީސީން ވިދާޅުވެފައިވާ ގޮތުގައި މަހުން މަހަށް ގަވާއިދުން ކުލި ދައްކަމުންދަނީ 3،362 ޔުނިޓުންނެވެ. އަދި ގަވާއިދުން ކުލި ނުދައްކާ 564 ޔުނިޓު ހުރިކަން އެކުންފުނިން ފާހަގަކުރައްވައެވެ.
ފަހި ދިރިއުޅުން ކޯޕަރޭޝަންގެ އަމާން އުދަރެސް އަދި އަމާން ދޯދި ފްލެޓުތަކާއި ގުޅިގެން އާންމުންގެ ފަރާތުން ޝަކުވާތައް ހުށައަޅާފައިވާއިރު އެތަންތަނުގެ އުސޫލުތަކާއި ޚިލާފުވެގެން އެފްޑީސީންވެސް އަންނަނީ މައްސަލަތައް ބަލަމުންނެވެ.
ކިޔުންތެރިންގެ ހިޔާލު