ފަހި ދިރިއުޅުން ކޯޕަރޭޝަން (އެފްޑީސީ)ގެ ފުލެޓުތަކުގެ ޔުޓިލިޓީ ބެލްކަނިތަކަށް އުސޫލާ ހިލާފަށް ގެނެސްފައިވާ ބަދަލުތައް އިސްލާހުކުރުމަށް، އެ ކޯޕަރޭޝަނުން ފުލެޓުތަކުގެ ވެރިންނަށް އެއް މަސް ދުވަހުގެ މުއްދަތެއް ދީފިއެވެ.
އެފްޑީސީން މިރޭ އާންމުކުރި އެންގުމެއްގައި ބަޔާންކޮށްފައިވަނީ، ޔުޓިލިޓީ ބެލްކަންޏަށް އެއްވެސް ބަދަލެއް ގެންނަންވާނީ އެ ކޯޕަރޭޝަންގެ ވެބްސައިޓުގައި ކަނޑައަޅާފައިވާ މިންގަނޑުތަކާ އެއްގޮތަށް ކަމަށެވެ. އެ މިންގަނޑުން ބޭރުން އެއްވެސް ބަދަލެއް ގެނައުމަކީ މަނާ ކަމެއްކަމަށް އެ ކުންފުނިން ބުންޏެވެ.
އެގޮތުން، ބެލްކަނިތަކާއި ކުޑަދޮރުތަކުގެ ސަލާމަތީ ކަންކަން ވަރުގަދަކުރުމަށް ހުއްދަ ދީފައިވަނީ ދެ ޑިޒައިނަކަށެވެ. ގްރިލް އެންޑް ނެޓް ފިކްސިންސްލައިޑިން ލޫވާ ފިކްސިންއެވެ.
އެހެންކަމުން، މި ދެ ގޮތުން ބޭރުން ބެލްކަންޏަށް ބަދަލު ގެނެސްފައިވާ ފަރާތްތަކުން އަންނަ މަހުގެ 28 ގެ ކުރިން އެކަންކަން ހަމަޖެހިފައިވާ އުސޫލަށް ފެއްތުމަށް އެފްޑީސީން ވަނީ އަންގާފައެވެ. އަދި ކަނޑައެޅިފައިވާ މުއްދަތުގައި އިސްލާހު ނުކުރާ ފަރާތްތައް ޖޫރިމަނާކޮށް، ގަވާއިދުން ފިޔަވަޅު އަޅާނެކަމަށް އެފްޑީސީން ބުންޏެވެ.
ފުލެޓުތަކުގެ ރައްކާތެރިކަން ވަރުގަދަކުރުމުގެ ފިޔަވަޅުތައް މި އެޅީ، ހުޅުމާލޭ ދެވަނަ ފިޔަވަހީގެ ޓަވަރުތަކުން ކުޑަކުދިން ވެއްޓުމުގެ ނުރައްކާތެރި ހާދިސާތަކެއް ހިނގާފައިވާ ދަނޑިވަޅެއްގައެވެ. އެގޮތުން މި މަހުގެ ދެވަނަ ދުވަހު އަމާން އުދަރެސް ޓަވަރުން 16 އަހަރުގެ ކުއްޖަކު ވެއްޓި އަނިޔާވެފައިވާއިރު، މި މަހުގެ ތިން ވަނަ ދުވަހު ސްޓެލްކޯ ފުލެޓުން ދެ އަހަރުގެ އަންހެން ކުއްޖަކު ވެއްޓި ވަނީ ފުރާނަ ގެއްލިފައެވެ.
މި ހާދިސާތަކާ ގުޅިގެން، “އަމާން އުދަރެސް” އަދި “އަމާން ދޯދި” ޓަވަރުތަކުގައި ދިރިއުޅޭ ކުޑަކުދިންނާއި ހާއްސަ އެހީއަށް ބޭނުންވާ މީހުން ދެނެގަނެ، އެންމެންގެ ސަލާމަތްތެރިކަން ކަށަވަރުކުރުމަށް އަޅަންޖެހޭ ފިޔަވަޅުތަކާ ގުޅޭގޮތުން މަޝްވަރާތައް ފަށާފައިވާކަމަށް އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް މި މަހުގެ ކުރީކޮޅު ވަނީ ވިދާޅުވެފައެވެ.
މީގެއިތުރުން، ހުޅުމާލޭގެ ފުލެޓުތަކުގެ ކުޑަދޮރުތަކާއި ބެލްކަނީގައި އިތުރު ރެއިލިން ހަރުކުރުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން އަންނަނީ ކުރަމުންނެވެ.
ކިޔުންތެރިންގެ ހިޔާލު