މިހާރު ކުރިއަށްދާ ޔުއެފާ ނޭޝަންސް ލީގުގައި ރޭ ޗެކް ރިޕަބްލިކާ ދެކޮޅަށް ކުޅުނު މެޗު އިންގްލޭންޑުން ކާމިޔާބުކޮށްފިއެވެ. އިންގްލޭންޑުން މެޗު ކާމިޔާބުކުރީ 0-2 އިންނެވެ.
މިއާއެކު އިންގްލޭންޑަށް 3 ޕޮއިންޓު ލިބި ގްރޫޕްގެ ދެވަނަ މަގާމަށް ވަނީ ޖެހިލާފައެވެ. މިއީ މި މުބާރާތުގައި އިންގލޭންޑު މޮޅުވި ފުރަތަމަ މެޗެވެ. މިދިޔަ ހަފްތާގައި އަމިއްލަ ދަނޑުގަިވެސް ވަނީ ސްޕެއިން އަތުން ބަލިވެފައެވެ.
ޗެކް ރިޕަބްލިކްގައި ކުޅުނު މި މެޗުގެ 25 ވަނަ މިނިޓުގައި ޗެކް ރިޕަބްލިކްގެ އެންމެ ނުރައްކާތެރި އެއް ކުޅުންތެރިޔާ ކަމުގައިވާ ޕަވެލް ސުލްޗް އެލިއަޓް އެންޑަސަން އަށް ކުރި ފައުލަކާއި ގުޅިގެން ރެފްރީ ވަނީ އޭނާއަށް ރަތް ކާޑު ދައްކާ ދަނޑުން ފޮނުވާލާފައެވެ. އެހެންކަމުން މެޗުގެ ގިނަ ވަގުތު ޗެކް ރިޕަބްލިކް އިން ކުޅެފައިވަނީ އެއް ކުޅުންތެރިއަކު މަދުކޮށެވެ.
ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވިފައިނުވި ނަމަވެސް ދެވަނަ ހާފުގެ ކުޅުން ފެށުނުތާ 2 ވަނަ މިނިޓޫގައި އެލެކްޒެންޑަރ އާނޯލްޑް ދިން ޕާހަކުން އެންތޮނީ ގޯޑޮން ވަނީ ލަނޑެއް ޖަހާ އިންގްލެންޑަށް ކުރި ހޯދަދީފައެވެ. އިންގްލެންޑް އިން މި މެޗުގައި ޖެހި ދެވަނަ ލަނޑަކީ މެޗުގެ 69 ވަނަ މިނިޓުގައި ހެރީ ކޭން ކާމިޔާބުކޮށްދީފައިވާ ލަނޑެކެވެ. މިއީ އޭނާ ގައުމީ ޓީމަށް ކުޅެދިން 123 ވަނަ މެޗުގައި ޖެހި 87 ވަނަ ލަނޑެވެ.
މިއީ ވޯލްޑްކަޕްގެ ސެމީ ފައިނަލުގައި އާޖެންޓީނާ އަތުން އިންގްލެންޑް ބަލިވި ފަހުން އެ ޓީމު މެޗަކުން މޮޅުވި ފުރަތަމަ ފަހަރެވެ.
މި މުބާރާތުގައި އަންނަ ހޮނިހިރު ދުވަހު އިންގެލްނޑް ނިކުންނާނީ ކްރޮއޭޝިޔާ އާއި ދެކޮޅަށެވެ.
ކިޔުންތެރިންގެ ހިޔާލު