ޔުއޭފާ ނޭޝަންސް ލީގުގައި ބެލްޖިއަމްއިން އިޓަލީވިލާތް ބަލިކޮށްފިއެވެ.
އިޓަލީވިލާތުގެ ވެރިރަށް ރޯމްގެ ސްޓާޑިއޯ އޮލިމްޕިކޯގައި ކުޅުނު މިމެޗު ބެލްޖިއަމް އިން ކާމިޔާބުކުރީ 2 -0 އިންނެވެ. ދެޓީމުގެ ފަރާތުން ފޯރިގަދަ އަދި ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އިޓަލީވިލާތުންނެވެ. ނަމަވެސް މިމެޗުގައި ލިބުނު ފުރުސަތު ތަކުގެ ބޭނުން ހިފިތަން ފެނިގެންދިޔައީ ބެލްޖިއަމް އިންނެވެ. ބެލްޖިއަމްއިން މެޗުގެ ފުރަތަމަ ލަނޑު ޖަހާ ލީޑު ނެގީ މެޗުގެ 20 ވަނަ މިނެޓުގައި އިޓަލީ މެދުތެރެއިން ގެއްލުވާލި ބޯޅައެއްގައި އުފެއްދި ކައުންޓަރ އެޓޭކެއްގައެވެ. މިލަނޑު އެޓީމަށް ކާމިޔާބު ކޮށްދިނީ މީކާ ގޮޓްސްއެވެ. މިއީ އޭނާ ބެލްޖިއަމް ޓީމަށް ކާމިޔާބު ކޮށްދިން ފުރަތަމަ ލަނޑެވެ. އިޓަލީވިލާތުގެ ކެޕްޓަން އަދި ކީޕަރ ޖިއާންލުއިޖީ ޑޮނަރޫމާގެ ވަނީ މިހާފްގައި ބެލްޖިއަމްގެ ގިނަ ހަމަލާތަކެއް ދިފާއު ކޮށްފައެވެ.
މިމެޗުގެ ދެވަނަ ހާފުގައި އިޓަލީވިލާތް ފެނިގެންދިޔައީ މުޅިން ތަފާތު ޓީމެއްގެ ގޮތުގައެވެ. މިގޮތުން މިހާފުގެ ފުރަތަމަ ކަށިގަނޑާއެކު އެޓީމުން ބެލްޖިއަމްގެ ގޯލަށް ނުރައްކާ ކުރަން ފެށިތަން ފެނިގެންދިޔައެވެ. މިހާފުގައި އިޓަލީވިލާތަށް ލަނޑެއް ކާމިޔާބު ނުކުރެވި ދިޔައީ ބެލްޖިއަމްގެ ކީޕަރ ސެނޭ ލެމެންސްގެ ހުށިޔާރު ކަމުންނެވެ. މިމެޗުގައި ބެލްޖިއަމް އިން ކާމިޔާބު ކުރި ދެވަނަ ލަނޑު މެޗުގެ 69 ވަނަ މިނެޓުގައި އެޓީމަށް ކާމިޔާބު ކޮށްދިނީ ބަދަލު ކުޅުންތެރިޔާ ޑޯޑީ ލުކެބާކިއޯއެވެ.
ރޮބާޓޯ މަންޗީނީ އަލުން ޤައުމީ ޓީމަށް ގެނެސް ކުޅުނު ފުރަތަމަ މެޗު އެޓީމުން ފެށިތަން ފެނިގެން މިދިޔައީ ނާކާމިޔާބީ އަކާއެކުއެވެ. އިޓަލީ ވަނީ އެންމެ ފަހުން ބޭއްވި ވޯލްޑް ކަޕުންވެސް ޖާގަހޯދޭގޮތް ނުވެފައެވެ.
އިޓަލީ ޤައުމީ ޓީމަށް އެޤައުމުގެ ރައްޔިތުންގެ ތާއީދު އޮތް ވަރު ބެލްޖިއަމް އާއި ދެކޮޅަށް ކުޅުނު މެޗަށް ވަން މީހުންގެ އަދަދުންވެސް ހާމަވެގެންދެއެވެ. 70 ހާސް މީހުންގެ ޖާގައިގެ ސްޓޭޑިއަމްއަށް ކުޅިބަލަން ވަން މީހުންގެ އަދަދަކީ 47 ހާސް 155 އެކެވެ.
ކިޔުންތެރިންގެ ހިޔާލު