ތ. ހިރިލަންދޫގައި 200 ޓަނުގެ ކޯލްޑް ސްޓޯރޭޖެއް ޤާއިމުކުރުމުގެ މަޝްރޫޢު މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން އެސްޖޭ ކޮންސްޓްރަކްޝަން ޕްރައިވެޓް ލިމިޓެޑާ ޙަވާލުކޮށް، އެކަމުގެ އެއްބަސްވުމުގައި ސޮއިކޮށްފިއެވެ.
މި މަޝްރޫޢަކީ ހިރިލަންދޫގައި މަސް ފިނިކޮށް ރައްކާކުރެވޭނެ ނިޒާމެއް ގާއިމުކޮށްދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެވަޑައިގެންފައިވާ ރިޔާސީ ވައުދުގެ ދަށުން ކުރިއަށްދާ މަސައްކަތެކެވެ. މިއީ އެ ރަށުގެ މަސްވެރިކަމުގެ ސިނާއަތަށް ބޮޑު ކުރިއެރުމެއް ލިބިގެންދާނެ މުހިންމު މަޝްރޫޢެކެވެ.
މި މަޝްރޫޢުގެ ދަށުން ތ. ހިރިލަންދޫގައި ދުވިސައްތަ މެޓްރިކް ޓަނުގެ ކޯލްޑް ސްޓޯރޭޖެކާއި، ދިހަ މެޓްރިކް ޓަނުގެ ބްލާސްޓް ފްރީޒަރެއްގެ އިތުރުން ސިފްރު ޑިގްރީ ސެލްސިއަސްގެ އެންޓޭ ރޫމެއް ގާއިމުކުރާނެއެވެ. އަދި މަސް ޕްރޮސެސްކުރާނެ ޚާއްޞަ ސަރަޙައްދަކާއި ކޮމްޕްރެސަރ ރޫމަކާއި ކަރަންޓު ވިއުގައާއި ބެކަޕް ޖަނަރޭޓަރާއި އަލިފާނުން ރައްކާތެރިވުމުގެ ނިޒާމުވެސް ގާއިމުކުރާނެއެވެ.
މީގެ އިތުރުން އީއެލްވީ ނިޒާމުތައް އެޅުމާއެކު، އިމާރާތުގެ ބޭރުގެ އެންމެހައި މަސައްކަތްތައްކޮށް ސައިޓް އެއްކޮށް ތަރައްޤީކޮށް ނިންމުމުގެ މަސައްކަތް މި މަޝްރޫޢުގައި ހިމެނެއެވެ. މަސްވެރިކަމާ ބެހޭ ވުޒާރާއިން ވިދާޅުވީ ދުވާލެއްގެ މައްޗަށް ތިރީސް ޓަނުގެ މަސް ގަނެ، މަހުގެ އެކި އުފެއްދުންތައް ތައްޔާރުކުރާ މި ރަށުގައި، ބާނާ މަސް ގިނަ ދުވަހަށް ތާޒާކަންމަތީ ރައްކާކުރެވޭނެ އިންތިޒާމެއް ހަމަޖެހުމަކީ މިހާރު ނުހަނު ބޭނުންތެރިވެފައިވާ ކަމެއްކަމަށެވެ.
ރާއްޖޭގެ މަސްވެރިކަމުގެ ސިނާއަތް ތަރައްގީކޮށް، މަސްވެރިން ބާނާ މަހަށް އެކަށީގެންވާ ހަމަ އަގު ހޯދައިދިނުމަށް ސަރުކާރުން ކުރައްވަމުން ގެންދަވާ މަސައްކަތްތަކުގެ ތެރެއިން “ޕްރައިވެޓް ސެކްޓަރ އިނީޝިއޭޓިވް މޮޑެލް” ގެ ދަށުން މި މަޝްރޫޢު ކުރިއަށް ގެންދިއުމަށް ޝައުގުވެރިކަން ފާޅުކޮށްފައިވާ ފަރާތާއެކު ކޮމާޝަލް މަޝްވަރާތައް ކުރިއަށް ގެންދިއުމުގެ ހުއްދައަށް އެދި ހުށަހަޅާފައިވާކަމަށްވެސް އެ ވުޒާރާއިން މައުލޫމާތު ދެއްވައެވެ.
ތ. ހިރިލަންދޫއަކީ އެއްހާސް އެއްސަތޭކަ ސާޅީސް ހައެއްގެ އާބާދީއެއް އޮތް، މަސްވެރިކަމަށް ވަރަށް ބޮޑަށް ބަރޯސާވެފައިވާ ރަށެކެވެ. ތަފާސްހިސާބުތަކުން ދައްކާގޮތުގައި އެވްރެޖްކޮށް ދުވާލަކު ތިރީސް ޓަނުގެ މަސް އެ ރަށަށް ބާލާއިރު، މަސްވެރިކަން ރަނގަޅު މޫސުންތަކުގައި މި އަދަދު ފަންސާސް ޓަނަށްވުރެ މައްޗަށް އަރައެވެ.
މިހާރުވެސް އެ ރަށުގެ ދިހައަކަށްވުރެ ގިނަ ފަރާތަކުން އަންނަނީ މަސް ކެއްކުމާއި، ހިއްކުމާއި، އަދި މަހުގެ އެކި އުފެއްދުންތައް ތައްޔާރުކުރުމުގެ މަސައްކަތް އަމަލީގޮތުން ކުރަމުންނެވެ. އެހެންކަމުން މި ރަށުގައި ކޯލްޑް ސްޓޯރޭޖެއް ގާއިމުކުރުމަކީ ރަށުގެ އިގްތިސާދަށާއި މަސްވެރިންނަށް ނުހަނު ބޮޑު މަންފާއެއް ކުރާނެ ކަމެކެވެ.
މަސް ބާނާ ވަގުތުން ފެށިގެން އޭގެ ތާޒާކަން ގެއްލުނަނުދީ ގިނަ ދުވަހު ރައްކާކުރެވޭނެ އިންތިޒާމު ހަމަޖެހުމުގެ ސަބަބުން، މަސް ކައްކާ ހިއްކާ ފަރާތްތަކަށް މެދުކެނޑުމެއްނެތި މަސް ލިބި، އުފެއްދުންތެރިކަން އިތުރުކުރުމަށް ބޮޑު ފަސޭހައަކަށް ވެގެންދާނެއެވެ. މީގެ އިތުރުން، ބާނާ މަސް އުކާލަން ނުޖެހި، ރައްކާކުރެވޭނެ ނިޒާމެއް ގާއިމުވުމަކީ މަސްވެރިންނަށް ލިބޭ އާމްދަނީ އިތުރުވެ، މަސްވެރިކަމުގެ ނަފާ ފުރިހަމައަށް ހޯދުމަށް މަގުފަހިވެގެންދާނެ ކަމެކެވެ.
ކިޔުންތެރިންގެ ހިޔާލު