ބ. ތުޅާދޫގައި ތަރައްގީކުރަމުންދާ ދެ ބުރީގެ ކަލްޗަރަލް ސެންޓަރުގެ ރެސްޓޯރަންޓް އިމާރާތުގެ ޓައި ބީމް ކާސްޓިން މަސައްކަތް ނިމި، މައި އިމާރާތުގެ ތަނބުތަކުގެ ކޮންކްރީޓް މަސައްކަތުގެ 50 އިންސައްތަ ނިމިއްޖެއެވެ.
މި މަޝްރޫއުގެ ދަށުން ރެސްޓޯރަންޓް އިމާރާތުގެ ޓައި ބީމްގެ މަސައްކަތް މުޅިން ފުރިހަމަކޮށްފައިވާއިރު، މައި އިމާރާތުގެ ތަނބުތައް އެޅުމުގެ މަސައްކަތް މިހާރު ދަނީ މަޝްރޫއު ހިންގާ ސައިޓުގައި ބާރަށް ކުރިއަށެވެ.
ތުޅާދޫގައި މިފަދަ ކަލްޗަރަލް ސެންޓަރެއް ތަރައްގީކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
ބ. އަތޮޅުގެ މީހުން ދިރިއުޅޭ ހުރިހާ ރަށަކަށް ރައީސުލްޖުމްހޫރިއްޔާ ކުރެއްވި ދަތުރުފުޅުގެ ތެރެއިން، 2025 ވަނަ އަހަރުގެ އޮގަސްޓު މަހުގެ 12 ވަނަ ދުވަހު ވަނީ މި މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްފައެވެ.
ތުޅާދޫއަކީ އަތްތެރިކަމުގެ މަސައްކަތާއި ދިވެހި ފަންނުވެރިކަމުގެ ހުނަރުވެރިކަމަށް މަޝްހޫރު ރަށެކެވެ. އަދި އެ ރަށަކީ ލޯކަލް ޓޫރިޒަމްވެސް ވަރަށް ބާރަށް ކުރިއަރަމުން އަންނަ ރަށެކެވެ.
އެހެންކަމުން އެ ރަށުގައި ގާއިމުކުރެވޭ މި ކަލްޗަރަލް ސެންޓަރު ވެގެންދާނީ ރަށުގެ އިގުތިސާދީ ހަރަކާތްތައް އިތުރުކޮށް، ރަށުގެ ތަނަވަސްކަމަށް ބޮޑު ހިއްސާއެއް ކުރާނެ މަޝްރޫއަކަށެވެ.
ކިޔުންތެރިންގެ ހިޔާލު