ދިވެހި ފުލުހުންގެ ޚދުމަތް މަދަނީ ވަކި މުއައްސަސާއެއްގެ ގޮތުގައި ހިނގަމުން އަންނަތާ 22 އަހަރު ފުރުން ފާހަގަ ކުރުމުގެ ގޮތުން ބާއްވާ “ބްލޫސް ފެމެލީ ނައިޓް” މިރޭ ސޯޝަލް ސެންޓަރުގައި އޮންނާނެއެވެ. މި ހަރަކާތުގައި ބައިވެރިވުމުގެ ފުރުސަތު އާންމުކޮށް ހުރިހާ ރައްޔިތުންނަށް ވަނީ ހުޅުވާލާފައެވެ.
މި ޝޯ ކުރިއަށްދާނީ މިރޭ 8:30 އިން 11:00 އަށެވެ. މި ޝޯގައި ލައިވް އެންޓަޓެއިންމަންޓާއި، ސަގާފީ ހަރަކާތްތަކާއި، މިއުޒިކާއި، ނެށުމުގެ އިތުރުން ފުލުހުންގެ އެކި ބަހާތަކާއި އެކި ފަންނާނުން ތައްޔާރުކޮށްފައިވާ ހާއްސަ އައިޓަމްތައް ފެނިގެންދާނެއެވެ.
މިރޭގެ ޝޯގައި މަޝްހޫރު ފަންނާނު ބާރަށު ޝިޔާމްގެ ހުށަހެޅުންތަކާއި، ހަބޭސް ބޮޑުބެރު ގްރޫޕްގެ ފޯރިގަދަ އައިޓަމްތައް ހިމެނެއެވެ. މީގެއިތުރުން، ދިވެހިރާއްޖޭގެ ގައުމީ ޔުނިވަރސިޓީ ސްޓޫޑެންޓް ޔޫނިއަން ގެ ޑާންސް އަދި ބޮޑުބެރު ގްރޫޕްގެ ހުށަހެޅުންތަކާއި، މަޖާ ކޮމެޑީ އައިޓަމްތައް ވެސް ގެނެސްދިނުމަށް ވަނީ ހަމަޖެހިފައެވެ. މި ޝޯގައި ފޯރިގަދަ 14 އައިޓަމެއް ފެނިގެންދާނެއެވެ.
ސްޓޭޖް ހަރަކާތްތަކުގެ އިތުރުން، ފުލުހުންނާއި ފުލުހުންގެ އާއިލާތަކުގެ އިތުރުން އާންމު ރައްޔިތުންނަށް އުފާވެރި މާހައުލެއްގައި ވަގުތު ހޭދަކޮށްލުމުގެ ފުރުސަތު ފަހިކޮށްދިނުމުގެ ގޮތުން، މި އިވެންޓް ކުރިއަށްދާ ސަރަހައްދުގައި ކާބޯތަކެތި ވިއްކާ ސްޓޯލްތައް ވެސް ގާއިމުކުރެވިފައިވާނެއެވެ.
ބްލޫސް ފެމެލީ ނައިޓް” އަކީ ފުލުހުންނާއި ފުލުހުންގެ އާއިލާތައް އަދި އާންމު ރައްޔިތުން އެކުވެރި، އުފާވެރި މާހައުލެއްގައި ބައްދަލުވެ، ގުޅުން ބަދަހިކުރުމުގެ ގޮތުން ބާއްވާ ހަރަކާތެކެވެ.
ކިޔުންތެރިންގެ ހިޔާލު