ސަރުކާރުން އިސްނަގައިގެން ކުރިއަށް ގެންދާ ފަސް މިލިޔަން ގަސް އިންދުމުގެ ޤައުމީ ޕްރޮގްރާމަށް ބޭނުންވާ ގަސް ހެއްދުމަށްޓަކައި، ނާސަރީ އެޅުމަށް އިތުރު 10 ރަށަކަށް މާލީ އެހީދީފިއެވެ.
މިކަމަށްޓަކައި މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާގައި ބޭއްވި ޚާއްސަ ރަސްމިއްޔާތެއްގައި، އެހީ ލިބުނު ރަށްރަށުގެ ކައުންސިލްތަކާއެކު ވަނީ އެއްބަސްވުންތަކުގައި ސޮއިކޮށްފައެވެ.
ނާސަރީ އެޅުމަށް މާލީ އެހީ ދީފައިވާ ރަށްތައް:
* ހދ. ނޮޅިވަރަން
* ކ. ހިންމަފުށި
* އދ. ދިއްދޫ
* ފ. ދަނރަބޫދޫ
* ދ. މީދޫ
* ލ. ފޮނަދޫ
* ލ. ހިތަދޫ
* ގދ. ވާދޫ
* ފުވައްމުލަށް ސިޓީ
* ސ. މީދޫ
މި ރަސްމިއްޔާތުގައި ވާހަކަދައްކަވަމުން މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު އަލީ ޝަރީފް ވިދާޅުވީ، ފަސް މިލިޔަން ގަސް އިންދުމުގެ މަޝްރޫޢުގެ ދަށުން މިއަހަރުގެ ތެރޭގައި 1 މިލިޔަން ގަސް އިންދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަނޑައަޅުއްވާފައިވާ އަމާޒު މިއަހަރު ނިމުމުގެ ކުރިން ފުރިހަމައަށް ހާސިލްވާނެކަމަށެވެ. ވަޒީރު ވިދާޅުވީ މިއަހަރުގެ މިހާތަނަށް 6 ލައްކަ ގަސް އިންދާފައިވާ ކަމަށާއި މިއާއެކު މިހާތަނަށް މުޅި ރާއްޖޭގައި 1.8 މިލިޔަން ގަސް އިންދާފައިވާކަމަށެވެ.
މި ރަށްރަށުގައި ޤާއިމުކުރާ ނާސަރީތަކުން އުފައްދާ ގަސްތައް ކައިރި އެހެން ސަރަހައްދުތަކާއި ރަށްރަށަށް ފޮނުވައިގެން އިންދުމަށް ވަނީ ހަމަޖެހިފައެވެ.
ކިޔުންތެރިންގެ ހިޔާލު