ފަހުގެ ތާރީޚެއްގައި ފަތުރުވެރިކަމުގެ މަޝްރޫޢުތަކަށް އެއްފަހަރާ އެންމެ ގިނަ ބިންތައް ދޫކުރި މި ބުރުގައި ހަލާލް ޓޫރިޒަމަށް ޚާއްޞަ ސަރަޙައްދުތަކެއް ހިމެނެއެވެ.
ރާއްޖޭގެ 6 އަތޮޅަކުން 15 ސަރަހައްދެއްގައި ރިސޯޓު ތަރައްޤީކުރުމަށްޓަކައި ބިޑު ހުށަހެޅުމުގެ ފުރުޞަތު މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަނުން ހުޅުވާލައިފިއެވެ.
މިއީ ފަހުގެ ތާރީޚެއްގައި ފަތުރުވެރިކަމުގެ މަޝްރޫޢުތަކަށް އެއްފަހަރާ މިހާ ގިނަ ބިންތަކެއް ދޫކުރުމަށް ނިންމެވި ފުރަތަމަ ފަހަރެވެ. މިފަހަރު ރިސޯޓު ތަރައްޤީކުރުމަށް ސަރަޙައްދުތައް ހުޅުވާލާފައިވަނީ ހއ. އަތޮޅު، ހދ. އަތޮޅު، ށ. އަތޮޅު، ނ. އަތޮޅު، ލ. އަތޮޅު އަދި އައްޑޫ ސިޓީންނެވެ.
އުތުރުގެ ސަރަހައްދުތަކުން 200 ހެކްޓަރުގެ 10 ފަޅެއް ބިން ހިއްކައިގެން ރިސޯޓު ހެދުމަށް ކުއްޔަށް ދޫކުރުމަށް ވަނީ ނިންމާފައެވެ. މިއިން ކޮންމެ ތަނެއްގައި މަދުވެގެން 150 އެނދުގެ ރިސޯޓެއް ތަރައްގީކުރަން ޖެހޭނެއެވެ. މީގެ ތެރޭގައި ހިމެނެނީ ހއ. މާދޫނި ފަޅުގެ 3 ސައިޓަކާއި، ހދ. މަކުނުދޫ ފަޅުގެ ސައިޓް 2، ހދ. މާފަރު ފަޅުގެ 3 ސައިޓެއްގެ އިތުރުން ށ. ގޮނާ ފަޅުގެ 3 ސައިޓެވެ. މި ފަޅުތަކަށް ބިޑް ހުށަހެޅުމުގެ ސުންގަޑިއަކީ ނޮވެމްބަރު 18 ވަނަ ދުވަހެވެ.
އޭގެ އިތުރުން ރިސޯޓު ތަރައްޤީކުރުމަށްޓަކައި ދެ ރަށެއްވެސް ވަނީ ބިޑަށް ހުޅުވާލާފައެވެ. އެއީ ށ. ނަލަންދޫ އާއި ނ. ފަރުމުލިއެވެ.
ނ. ފަރުމުލިއަކީ މި ބުރުގައި އެންމެ އަގުބޮޑުކޮށް ހުޅުވާލި ރަށެވެ. އެ ރަށުގެ އެކިއުޒިޝަން ކޮސްޓަކީ 2.25 މިލިއަން އެމެރިކާ ޑޮލަރެވެ. ނ. ފަރުމުލީގައި 150 އެނދުގެ ރިސޯޓެއް ތަރައްގީކުރަން ޖެހޭއިރު، އެ ރަށުގެ ބިޑް ހުށަހެޅުމުގެ ސުންގަޑިއަކީ ނޮވެމްބަރު 17 ވަނަ ދުވަހެވެ. ށ. ނަލަންދޫގައި މަދުވެގެން 200 އެނދުގެ ރިސޯޓެއް ތަރައްގީކުރަން ޖެހޭއިރު، އެ ރަށަށް ބިޑް ހުށަހެޅުމުގެ ސުންގަޑިއަކީ ނޮވެމްބަރު 23 ވަނަ ދުވަހެވެ.
މި ބިޑްގެ އެންމެ ފާހަގަކޮށްލެވޭ އެއް ކަމަކީ އިސްލާމީ އުޞޫލުތަކަށް ފެތޭ ‘ހަލާލް ޓޫރިޒަމް’ އަށް ޚާއްޞަކޮށްގެން ތިން ސަރަޙައްދެއް ކަނޑައަޅާފައިވުމެވެ. އެއީ ހދ. މަކުނުދޫ ފަޅުން 200 ހެކްޓަރުގެ ސަރަޙައްދަކާއި، ލ. ފޮނަގަދޫގެ 8.18 ހެކްޓަރުގެ ބިމުގެ އިތުރުން އައްޑޫ ސިޓީގެ ދޮންހެރަ ހިމެނޭ ސަރަޙައްދެވެ.
މި ރިސޯޓުތަކުގައި އޫރުމަހާއި ރާ ވިއްކުން މަނާވާނެއެވެ. އަދި ހަލާލް ސެޓްފިކެޓް ލިބިފައިވާ ކާބޯތަކެތި ލިބެން ހުންނަންޖެހޭނެއެވެ. މީގެ އިތުރުން އަންހެނުންނާއި ފިރިހެނުންނަށް ވަކިން ސްޕާގެ ޚިދުމަތް ދިނުމާއި، މުވައްޒަފުންނާއި ފަތުރުވެރިންނަށް ވަކި މިސްކިތްތައް ހުންނަންޖެހޭނެއެވެ.
މިފަދަ މަޝްރޫޢުތަކަށް ހިތްވަރު ދިނުމުގެ ގޮތުން އިމްޕޯޓް ޑިއުޓީން 20 އިންސައްތައިގެ ލުޔެއް ދިނުމަށް ވަނީ ނިންމާފައެވެ.
މި ބުރުގައި ހުޅުވާލެވުނު ހުރިހާ ސަރަޙައްދެއްވެސް ކުއްޔަށް ދޫކުރުމަށް ހަމަޖެހިފައިވަނީ 50 އަހަރުގެ މުއްދަތަށެވެ.
ކިޔުންތެރިންގެ ހިޔާލު