މިދިޔަ ޖޫން މަހު އިމްޕޯޓު އެކްސްޕޯޓުން ދައުލަތަށް 406 މިލިޔަން ރުފިޔާގެ އާމްދަނީއެއް ލިބިފައިވާކަމަށް ކަސްޓަމްސްގެ ތަފާސްހިސާބުތަކުން ދައްކައިފިއެވެ. މިއީ މިދިޔަ މޭމަހު ދައުލަތަށް ލިބުނު އާމްދަނީއާ އަޅާބަލާއިރު އިތުރު އަދަދެކެވެ. މިދިޔަ މޭމަހު އިމްޕޯޓު އެކްސްޕޯޓުން ދައުލަތަށް ލިބިފައިވަނީ 322 މިލިޔަން ރުފިޔާއެވެ.
ޖޫން މަހު ރާއްޖެއަށް 6.7 ބިލިޔަން ރުފިޔާގެ މުދާ އިމްޕޯޓުކޮށްފައިވާއިރު، މިއީ މޭ މަހަށްވުރެ 21.8 އިންސައްތަ އިތުރުވުމެކެވެ. އެންމެ ގިނައިން މުދާ އެތެރެކޮށްފައިވަނީ އޮމާން (1,601 މިލިޔަން ރުފިޔާ)، އިންޑިއާ (1,502 މިލިޔަން ރުފިޔާ) އަދި ޗައިނާ (922 މިލިޔަން ރުފިޔާ) އިންނެވެ. އެންމެ ގިނައިން އެތެރެކޮށްފައިވަނީ ތެލާއި ގޭހުގެ ބާވަތްތަކުގެ އިތުރުން ކެއިންބުއިމުގެ ބާވަތްތަކެވެ.
އެކްސްޕޯޓަށް ބަލާއިރު، ޖޫން މަހު ރާއްޖެއިން 153 މިލިޔަން ރުފިޔާގެ މުދާ އެކްސްޕޯޓުކޮށްފައިވެއެވެ. މިއީ މޭ މަހު އެކްސްޕޯޓުކުރި 98 މިލިޔަން ރުފިޔާއާ އަޅާބަލާއިރު 56 އިންސައްތައިގެ ކުރިއެރުމެކެވެ.
ރާއްޖެއިން އެންމެ ގިނައިން މުދާ އެކްސްޕޯޓުކޮށްފައިވަނީ ތައިލޭންޑަށެވެ. އެއީ 95 މިލިޔަން ރުފިޔާގެ މުދަލެވެ. ދެވަނައަށް އެންމެ ގިނައިން އިނގިރޭސިވިލާތަށް (23 މިލިޔަން ރުފިޔާ) އެކްސްޕޯޓުކޮށްފައިވާއިރު، ތިންވަނައަށް އެންމެ ގިނައިން މުދާ އެކްސްޕޯޓުކޮށްފައިވަނީ އިންޑިއާއަށެވެ.
ކިޔުންތެރިންގެ ހިޔާލު