އަހަރުގެ ފުރަތަމަ 6 މަހު ލޯނުތައް އަނބުރާ ދެއްކުމަށް ދަޢުލަތުން 9.2 ބިލިޔަން ރުފިޔާ ޚަރަދުކޮށްފިއެވެ.
އާންމުކޮށްފައިވާ މާލީ ވުޒާރާގެ މަންތުލީ ފިސްކަލް ޑިވޮލޮޕްމެންޓް ރިޕޯޓުގައި ވަނީ ލޯނުތައް އަނބުރާ ދެއްކުމަށް މިއަހަރު 12.9 މިލިޔަން ރުފިޔާ ޚަރަދުވާނެކަމަށް އަންދާޒާކޮށްފައެވެ. ތަފާސް ހިސާބުތަކުގައި ބުނެފައިވަނީ ދަޢުލަތުން ނަގާފައިވާ ލޯނުތައް އަނބުރާ ދެއްކުމަށް މިއަހަރުގެ ފުރަތަމަ 6 މަހު މުޅި ޖުމްލަ 9.2 ބިލިޔަން ރުފިޔާ ޚަރަދުކޮށްފައިވާކަމަށެވެ. މިދިޔަ އަހަރުގެ މި މުއްދަތުގައި ލޯނުތައް އަނބުރާ ޚަރަދުކޮށްފައިވަނީ 3.3 ބިލިޔަން ރުފިޔާއެވެ. އެހެންކަމުން މިއީ 178 އިންސައްތަ އިތުރު އަދަދެކެވެ. ނަމަވެސް މިދިޔަ މަހު މިކަމަށް ކުރި ޚަރަދު ވަނީ ދަށްވެފައެވެ. އެގޮތުން މިދިޔަ ޖޫންމަހުގެ ތެރޭގައި ލޯނުތައް އަނބުރާ ދެއްކުމަށް ދަޢުލަތުން 288 މިލިޔަން ރުފިޔާ ވަނީ ޚަރަދުކޮށްފައެވެ. މިއީ މިދިޔަ އަހަރުގެ މި މުއްދަތުގައި މިކަަމަށް ޚަރަދުކުރި 697 މިލިޔަން ރުފިޔާއާ އަޅާ ބަލާއިރު 58 އިންސައްތަ ދަށް އަދަދެކެވެ.
މި އަހަރު ބޮޑެތި ލޯނުތައް ދެއްކުމުގައިވެސް ބޭނުންކުރީ އެސްޑީއެފް ފަންޑަށް ޖަމާކޮށްފައިވާ ފައިސާއެވެ.
ސޮވެރިން ފަންޑަކީ، ކުއްލި ހާލަތުގައި ކުރިމަތިވެދާނެ ކަންކަމަށް އަދި ތަރައްޤީގެ ތަފާތު މަޝްރޫޢުތައް ހިންގުމަށް ނަގާ ބޮޑެތި ލޯނުތައް އަނބުރާ ދެއްކުމަށާއި، އިޤްތިޞާދަށް އަތުވެދާނެ ލޮޅުމަކުން ލިބޭ ގެއްލުން ފޫބެއްދުމަށް ސަރުކާރުން އުފައްދާފައިވާ ފަންޑެކެވެ. މިއީ މަރުކަޒީ ބޭންކް، އެމްއެމްއޭގެ ރިޒާވްއާ މުޅިން ތަފާތު ފަންޑެކެވެ.
ކިޔުންތެރިންގެ ހިޔާލު