ފުޓުބޯޅާއިގެ މައި އިދާރާ ފީފާގެ ރައީސް ޖިއާނީ އިންފަންޓީނޯ އިއުލާންކުރި ކޮމާޝަލް ސަބްސިޑިއަރީ އުފެއްދުމުގެ ޕްލޭނަށް ތާއިދުކުރާ މެމްބަރު ކޮންމެ ގައުމުތަކަށް 40 މިލިއަން އެމެރިކާ ޑޮލަރުގެ މާލީ އެހީ ލިބޭނެކަމަށް ބުނެފިއެވެ. އެ ޕްލޭނާ ބެހޭގޮތުން ފީފާގެ 211 މެންބަރު ގައުމަށް، އިންފަންޓީނޯ ވަނީ ސިޓީއެއް ފޮނުވާފައެވެ.
ފީފާގެ ރައީސް އެ ޖަމްއިއްޔާގެ މެންބަރު ޤައުމުތަކަށް ފޮނުވާފައިވާ ސިޓީ ދުނިޔޭގެ ބޮޑެތި މީޑިއާތަކުން ދަނީ ދައުރުކުރަމުންނެވެ. އެ ސިޓީގައި ބުނެފައިވަނީ ބުނެފައިވާ ގޮތުން އަންނަ ސެޕްޓެމްބަރ މަހުގެ 19 ވަނަ ދުވަހުގެ ކުރިން އެކަމަށް ތާއިދުކުރާ ފަރާތްތަކަށް 20 މިލިއަން އެމެރިކާ ޑޮލަރު އެޑްވާންސްގެ ގޮތުގައި ލިބޭނެކަމަށެވެ. އެޖަމްއިއްޔާއިން މިހާތަނަށް ކުރަމުންދިޔަ މަސައްކަތްތައް ކަމަށްވާ ފުޓްބޯޅަ ހިންގުމާއި، މުބާރާތްތައް ރޭވުމާއި، މެޗުތަކުގެ ކަލަންޑަރާއި އަދި ކުޅިވަރާއި ގުޅުންހުރި ހުރިހާ ނިންމުންތަކެއް ނިންމުމުގެ ބާރު ކުރިއަށް އޮތްތާނގައިވެސް އޮންނާނީ އަލަށް އުފެއްދުމަށް މަސައްކަތް ކުރާ އެޖަމްއިއްޔާގެ އަތުގައެވެ. ނަމަވެސް މިކަމާ ދެކޮޅަށް ޔޫރަޕްގެ ފުޓްބޯޅައިގެ މައި އިދާރާ, ޔޫއެފާ އިން ވަނީ ތެދުވެ އެކަމާއި ދެކޮޅަށް މަސައްކަތް ފަށާފައެވެ. އެގޮތުން ޔޫއެފާ އިން ބުނެފައިވަނީ މިހުށަހެޅުމާއެކު ފީފާއިން މިވަނީ ފުޓްބޯޅަ ހިންގާ އެއްވެސް އިދާރާއަކުން ހުރަސް ކުރަން ނުޖެހޭ ރޮނގެން ހުރަސްކޮށްފައެވެ.
ޔުއޭފާއިން ބުނެފައިވަނީ އެއިދާރާއިން އަންނަނީ މިކަން ވަރަށް ސީރިއަސްކޮށް ބަލަމުން ކަމަށެވެ. އަދި ފީފާގެ މެންބަރު ހުރިހާ އެސޯސިއޭޝަންތަކުންވެސް މިކަމާ މެދު ސަމާލުވާން ޖެހޭކަމަށާއި ލީގުތަކާއި ކްލަބް ތަކާއި ކުޅުންތެރިންނާއި ސަޕޯޓަރުންނާއި ސަރުކާރުތަކާއި އަދި ކުޅިވަރުގެ ކުރިމަގަށް ހެޔޮއެދޭ އެންމެންވެސް ވިސްނަން ޖެހޭނެކަމަށް ޔުއެފާއިން ބުންޏެވެ.
ފުޓްބޯޅައިގެ ރޫހާއި ހިންގުމަކީ ވިޔަފާރިކުރެވޭނެ އެއްޗެއް ނޫންކަމަށް ޔުއެފާއިން ބުންޏެވެ.
ލީކުވެފައިވާ މި ސިޓީގައި ބުނެފައިވާ ގޮތުން މިކަމަށް އެއްބަސްވާ މެމްބަރު އެސޯސިއޭޝަން ތަކަށް 20 މިލިއަން އެމެރިކާ ޑޮލަރު އަންނަ ޖެނުއަރީ މަހުގެ 1 ވަނަ ދުވަހުގެ ފަހުން ލިބޭނެކަމަށެވެ.
ކިޔުންތެރިންގެ ހިޔާލު