މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއުގެ ދަށުން، ބަނދަރުގެ މުހިންމު ހިދުމަތްތައް މާލޭގެ އިންޑަސްޓްރިއަލް ވިލެޖު މެދުވެރިކޮށް ފޯރުކޮށްދިނުމަށް ސަރުކާރުން ނިންމައިފިއެވެ. މި މަޝްރޫއަކީ ރާއްޖޭގެ އިގްތިސޯދު ކުރިއެރުވުމަށް އެޅޭ މުހިންމު ފިޔަވަޅެއްކަމަށާއި، ތިލަފުށީގައި އާ ބަނދަރުގެ އޮޕަރޭޝަންތައް އަންނަ އަހަރުގެ ނޮވެމްބަރު މަހުގެ 11 ވަނަ ދުވަހު ފެށޭނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީއެސްއެމް ނިއުސްގެ “ނޭޝަން ޗެޓް” ޕްރޮގްރާމުގައި ވާހަކަފުޅު ދައްކަވަމުން ރައީސް ފާހަގަކުރެއްވި ގޮތުގައި، މި ބަދަލާއެކު ވިޔަފާރި ބަނދަރުގެ އޮޕަރޭޝަންތަކުގެ ބޮޑު ބައެއް، ގާތްގަނޑަކަށް 80 އިންސައްތަ މަސައްކަތް ތިލަފުއްޓަށް ބަދަލުވެގެންދާނެއެވެ. ބަނދަރުގެ ބާކީ ހުރި މަސައްކަތްތައް މާލޭގެ އިންޑަސްޓްރިއަލް ވިލެޖާއި ޓީޖެޓީ ސަރަހައްދުގައި ރޭވުންތެރިކަމާއެކު ކުރިއަށްގެންދިއުމަށް ހަމަޖެހިފައިވާކަމަށް އެމަނިކުފާނު ވިދާޅުވިއެވެ.
އާ ބަނދަރުގެ އޮޕަރޭޝަންތައް ކުރިއަށްދާނީ ޑިޖިޓަލައިޒް ކުރެވިގެން ކަމަށާއި، ތިލަމާލެ ބްރިޖުގެ މަސައްކަތް ނުނިމުނު ނަމަވެސް، ކޮންޓެއިނަރު އޮޕަރޭޝަންތަކާއި ރޯރޯ ފެރީގެ ހިދުމަތްތައް މެދުނުކެނޑި ދެވޭނެ އިންތިޒާމުތައް ހަމަޖައްސަވާނެކަމަށް ރައީސް ޔަގީންކަން ދެއްވިއެވެ. މީގެ އިތުރުން، އިންޑަސްޓްރިއަލް ވިލެޖާއި ތިލަފުށިން އަމިއްލަ ވިޔަފާރިތަކަށް ޖާގަ ދޫކޮށް، ވިޔަފާރިވެރިންނަށް ލުއިފަސޭހަތަކެއް ހޯދައިދިނުމަކީ ސަރުކާރުގެ މުހިންމު އަމާޒެއްކަމަށް އެމަނިކުފާނު ފާހަގަކުރެއްވިއެވެ.
ޗައިނާ ހާބާ އިންޖިނިއަރިން ކުންފުންޏާއި އެމްޓީސީސީ ގުޅިގެން ކުރިއަށްގެންދާ މި މަޝްރޫއަކީ މިހާރު މާލޭގައި ހުރި ބަނދަރަށްވުރެ 10 ގުނަ ބޮޑު ބިމެއްގައި ގާއިމުކުރާ ތަނެކެވެ. އަދި މި ބަނދަރުގެ މަގަތުފާލަން މިހާރުގެ ފާލަމަށްވުރެ ތިން ގުނަ ދިގުވާނެއެވެ. މި މަޝްރޫއުގެ ސަބަބުން މުދާ ބަރުކުރުމާއި ބޭލުމުގެ މަސައްކަތްތަކަށް ބޮޑެތި ފަސޭހަތަކެއް ލިބި، މުދަލުގެ އަގު ހެޔޮވެ، ރާއްޖޭގެ އިގްތިސޯދު ފުޅާވެގެންދާނެކަމަށް ސަރުކާރުން ގަބޫލުކުރެއެވެ.
ކިޔުންތެރިންގެ ހިޔާލު