މި އަހަރުގެ މިހާތަނަށް ރާއްޖޭގައި ހިމަބިހި ނުވަތަ މީސްލްސް ޖެހުނު މީހުންގެ ޖުމުލަ އަދަދު 186 އަށް އަރައިފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ހާމަކޮށްފިއެވެ.
އެޗްޕީއޭއިން އާންމުކުރި ތަފާސްހިސާބުތަކުން ދައްކާ ގޮތުގައި، ހިމަބިހި ފެތުރޭ މިންވަރު އިތުރުވަމުން އަންނައިރު، ހަމައެކަނި މިދިޔަ ހަފުތާގައި ވެސް މާލެ ސަރަހައްދުން މި ބަލީގެ 22 ކޭސް ވަނީ ފެނިފައެވެ. ބަލި ކޮންޓްރޯލް ކުރުމަށްޓަކައި ވެކްސިން ދިނުމުގެ މަސައްކަތް ސަރުކާރުން މިހާރު ވަނީ ވަރުގަދަކޮށްފައެވެ. އެގޮތުން، މި އަހަރުގެ މިހާތަނަށް 12،000 އަށް ވުރެ ގިނަ މީހުންނަށް ވެކްސިން ދީފައިވާ ކަމަށް އެ އިދާރާއިން މައުލޫމާތު ދެއެވެ.
ވެކްސިންގެ ދެ ޑޯޒް ފުރިހަމަކޮށްފައިވާކަން ޔަގީން ނުވާ ފަރާތްތަކުން ލަސްނުކޮށް ވެކްސިން ފުރިހަމަ ކުރުމަށް އެޗްޕީއޭއިން ވަނީ އިލްތިމާސްކޮށްފައެވެ. ބަލި ޖެހިފައިވާ މީހުންނާ ކޮންޓެކްޓްވިކަން އެނގޭ މީހުންނަށް، ހުޅުމާލެ ހޮސްޕިޓަލާއި އާބަން ޕްރައިމަރީ ހެލްތު ކެއާ ސެންޓަރުތަކުން ވެކްސިން ދިނުމުގެ ހާއްސަ އިންތިޒާމުތައް ވަނީ ހަމަޖައްސައިފައެވެ. މީގެ އިތުރުން މާލެ ސަރަހައްދުގެ ހޮސްޕިޓަލްތަކާއި އަތޮޅުތަކުގެ ސިއްހީ މަރުކަޒުތަކުން ކަނޑައެޅިފައިވާ ވަގުތުތަކުގައި ވެކްސިންގެ ހިދުމަތް ލިބެން ހުންނާނެ ކަމަށް ވެސް އެ އެޖެންސީން ބުނެފައިވެއެވެ.
މި ބައްޔަކީ “މީސްލްސް ވައިރަސް”ގެ ސަބަބުން ފެތުރޭ ބައްޔެއްކަމުން، ބަލި ޖެހިފައިވާ މީހަކު ކެއްސާ ކިނބިހިއެޅުމުގެ ތެރޭގައި ވައިގެ ތެރެއަށް ދޫވާ ޖަރާސީމުންނާއި، ބަލި ޖެހިފައިވާ މީހާ ބޭނުންކުރާ ތަކެތިން ފަސޭހައިން އެހެން މީހުންނަށް ފެތުރުމުގެ ފުރުސަތު އޮވެއެވެ. ގަދައަށް ހުން އައުމާއި، ނޭފަތުން ފެންއައުމާއި، ކިނބިހި އެޅުމާއި، ކެއްސުމާއި، ހަށިގަނޑުގައި ރަތް ބިހިތަކެއް ނެގުމަކީ މި ބަލީގެ އާންމު އަލާމާތްތަކެވެ. މިފަދަ އަލާމާތްތައް ފެނިއްޖެނަމަ ލަސްނުކޮށް ސިއްހީ ފަރުވާ ހޯދުމަކީ ބަލި ފެތުރުން ހުއްޓުވުމަށް އެޅޭނެ މުހިންމު ފިޔަވަޅެކެވެ.
ކިޔުންތެރިންގެ ހިޔާލު