ރާއްޖޭގެ ކަނޑުގެ ސަރަޙައްދު ބެލެހެއްޓުމުގެ ޤާބިލުކަން އިތުރުކުރުމަށް ގެނައި މި މަނަވަރު ޚިދުމަތަށް ނެރެދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
ދިވެހިރާއްޖޭގެ ކަނޑުގެ ސަރަޙައްދު ބެލެހެއްޓުމާއި، ޚާއްޞަ އިޤުތިޞާދީ ސަރަޙައްދު ރައްކާތެރިކުރުމުގެ ޤާބިލުކަން އިތުރުކުރުމަށްޓަކައި އޮސްޓްރޭލިއާ ސަރުކާރުން ހަދިޔާކުރި ޚާއްޞަ މަނަވަރު، “ކޯސްޓްގާޑް ޝިޕް އިމާދުއްދީން” ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒު ރަސްމީކޮށް ސިފައިންގެ ޚިދުމަތަށް ނެރެދެއްވައިފިއެވެ.
އޮސްޓްރޭލިއާގެ އޮސްޓަލް ލިމިޓެޑުން ބަނދެފައިވާ މި މަނަވަރަކީ ކަނޑުމަތީގެ ސަވައިލަންސް ބެލެހެއްޓުމަށް ބޭނުންވާ އެންމެ ޒަމާނީ ވަސީލަތްތަކާއި ޓެކްނޮލޮޖީ ހިމެނޭ އުޅަނދެކެވެ. މިދިޔަ މަހުގެ މެދުތެރޭގައި ރާއްޖެ ގެނައި މި މަނަވަރަކީ އޮސްޓްރޭލިއާގެ ޕާތުން ފުރައިގެން 14 ދުވަހުގެ ދިގު ދަތުރަކަށްފަހު ރާއްޖެ ގެނައި އުޅަނދެކެވެ. މިއީ އެމްއެންޑީއެފް ކޯސްޓްގާޑުގެ ފަޅުވެރިން މިހާތަނަށް ކުރި އެންމެ ދިގު ކަނޑުދަތުރަށް ވާއިރު، މި އުޅަނދު ދުއްވުމަށްޓަކައި ކޯސްޓްގާޑުގެ ސިފައިން ވަނީ ތިން މަސްދުވަހުގެ ޚާއްޞަ ތަމްރީނުތަކެއް އޮސްޓްރޭލިއާގައި ފުރިހަމަކޮށްފައެވެ.
މި މަނަވަރަށް ނަންދެވިފައިވަނީ 17 ވަނަ ޤަރުނުގައި ރާއްޖޭގެ ދިފާޢީ ކަންކަން ވަރުގަދަކުރެއްވުމަށް ގިނަ މަސައްކަތްޕުޅުތަކެއް ކުރެއްވި ރަސްކަލެއް ކަމަށްވާ ސުލްޠާން މުޙައްމަދު ޢިމާދުއްދީން އެކެއްގެ ނަންފުޅަށް ނިސްބަތްކޮށެވެ. މަނަވަރު ޚިދުމަތަށް ނެރުމުގެ ރަސްމިއްޔާތުގައި ވާހަކަދައްކަވަމުން ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީ ވިދާޅުވީ، މި ސަރުކާރުން އަސްކަރީ އަދި ކަނޑުގެ ދިފާޢީ ބާރު ވަރުގަދަކުރުމަށް ޚާއްޞަ އިސްކަމެއް ދެއްވާ ކަމަށެވެ. އަދި އާ މަނަވަރާއެކު ރާއްޖޭގެ ކަނޑުގެ ސަރަޙައްދުގެ ކޮންމެ މޭލެއް ފަސްޖެހުމެއް ނެތި ބެލެހެއްޓުމުގެ ޤާބިލުކަން އިތުރުވެގެންދާނެ ކަމަށްވެސް އެމަނިކުފާނު ފާހަގަކުރެއްވިއެވެ.
ސީޖީއެސް އިމާދުއްދީންގެ ސަބަބުން ގަވާއިދާ ޚިލާފަށް މަސްވެރިކަން ކުރުމާއި، ވަގުފާރި އަދި ކަނޑުފޭރުން ހުއްޓުވުމަށް ބޮޑު އެހީތެރިކަމެއް ލިބޭނެއެވެ. މީގެ އިތުރުން، ކަނޑުމަތީގައި ދިމާވާ ހާދިސާތަކުގައި މީހުން ސަލާމަތްކުރުމުގެ މަސައްކަތްތައް މިހާރަށްވުރެ ހަލުވިކަމާއެކު ކުރިއަށް ގެންދެވޭނެ ކަމަށް އެމްއެންޑީއެފުން މަޢުލޫމާތުދެއެވެ.
މި އުޅަނދަކީ ކޯސްޓްގާޑުގެ ޤާބިލުކަން ދެގުނަ ކުރުމަށް ސަރުކާރުން ވެފައިވާ ވަޢުދުގެ ދަށުން ޚިދުމަތަށް ނެރުނު އުޅަނދެކެވެ. މީގެ ކުރިން ތުރުކީވިލާތުން ވެސް ވަނީ ކޯސްޓްގާޑް އުޅަނދަކާއި ވައިގެމަގުން ސަރަޙައްދު ބެލެހެއްޓުމަށް ޑްރޯންތަކެއް ހޯދާފައެވެ. މި ހުރިހާ ވަސީލަތްތަކާއެކު އިންޑިއާ ކަނޑުގެ ސަލާމަތާއި ރައްކާތެރިކަން ދެމެހެއްޓުމުގައި ރާއްޖޭގެ ދައުރު އިތުރަށް ފުޅާވެގެންދާނެއެވެ.
ކިޔުންތެރިންގެ ހިޔާލު