އަމީނީ މަގުގެ ހުޅަނގުކޮޅުގައި އަލުން ތާރުއެޅުމުގެ އަމަލީ މަސައްކަތް ފެށުމަށްޓަކައި، އެމްޓީސީސީން މިއަދު އެ މަގުގެ ޕްރީ-ކޮންސްޓްރަކްޝަން ސާވޭގެ ދަށުން ކޯ ކަޓިން މަސައްކަތްތައް ފަށައިފިއެވެ.
ކުރީގެ ސަރުކާރުން 84.4 މިލިއަން ރުފިޔާ ހަރަދުކޮށްގެން ތަރައްގީކުރި އަމީނީ މަގުގެ އެންމެ ފަހު ސެގްމަންޓްތައް ނިންމައި އާންމުންނަށް ހުޅުވާލިތާ ދެ އަހަރެއްހާ ދުވަސް ވެފައިވާއިރު، ހާބަރު ފުޑްކޯޓު ސަރަހައްދުގެ ތާރުގަނޑު ވަނީ ވަރަށް ބޮޑަށް ހަލާކުވެފަ އެވެ. އެ ސަރަހައްދުގެ ތާރުގަނޑު މުލިހިތަކެއްހެން އުފުލި، އުޅަނދުފަހަރު ދުއްވަން ނުރައްކާތެރި މިންވަރަކަށް ގޯސްވެފައިވާތީ، އާންމު ރައްޔިތުން ދަނީ އެ ކަމުގެ ދަތިކަން އުފުލަމުންނެވެ.
މި މައްސަލައަށް ހައްލެއް ގެނައުމުގެ ގޮތުން، އެމްޓީސީސީން ވަނީ އަމީނީ މަގުގެ ހުޅަނގަށްވީ ބައިގެ ތާރުގަނޑު އެއްކޮށް ނަގައި، އަންނަ ހަފުތާގެ ތެރޭގައި އަލުން ތާރުއެޅުމުގެ އަމަލީ މަސައްކަތް ފެށުމަށް މިހާރު ތައްޔާރުވެފައެވެ. މިއަދު ކުރިއަށްގެންދިޔަ ކޯ ކަޓިން މަސައްކަތުގެ އަލީގައި މަގުގެ އަޑީގެ ހާލަތު ދެނެގަނެ، ފަސްގަނޑާއި ތާރުގެ ފެންވަރު ވަޒަންކޮށް، ދާއިމީ ހައްލެއް ހޯދައިދިނުމަށް މަގުފަހިވެގެންދާނެ އެވެ.
އަމީނީ މަގުގެ އިތުރުން މާލޭގެ މުހިންމު އެހެން މަގުތަކެއް ކަމަށްވާ އިއްޒުއްދީން މަގާއި ބޮޑުތަކުރުފާނު މަގުގެ މަރާމާތުތައް ވެސް މި މަޝްރޫއުގެ ތެރޭގައި ހިމެނެ އެވެ. އެމްޓީސީސީން މައުލޫމާތުދޭ ގޮތުގައި، މި މަޝްރޫއުގެ މަސައްކަތްތައް އެއްކޮށް ނިމުމުން، މާލޭގެ ބޮޑެތި މަގުތަކަކީ އުޅަނދުފަހަރަށާއި ހިނގާބިނގާވެ އުޅޭ ފަރާތްތަކަށް ރައްކާތެރި އަދި ލުއިފަސޭހަ މަގުތަކަކަށް ވެގެންދާނެއެވެ.
ކިޔުންތެރިންގެ ހިޔާލު