ދިވެހިރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި ބައިވެރިވެވަޑައިގަތުމަށް ބަންގްލަދޭޝްގެ ފޮރިން މިނިސްޓަރު ޑރ. ޚަލީލުއްރަޙްމާން ރާއްޖެއަށް ކުރެއްވި ރަސްމީ ދަތުރުފުޅު ކާމިޔާބުކަމާއެކު ނިންމަވާލައްވައިފިއެވެ. މިއީ 17 ފެބްރުއަރީ 2026 ގައި މަޤާމާ ހަވާލުވެވަޑައިގަތުމަށްފަހު އެ މަނިކުފާނު ރާއްޖެއަށް ކުރެއްވި ފުރަތަމަ ރަސްމީ ދަތުރުފުޅެވެ.
މި ދަތުރުފުޅަކީ ދިވެހިރާއްޖޭގެ ފޮރިން މިނިސްޓަރު އިރުތިޝާމް އާދަމްގެ ދައުވަތަކަށް، ދިވެހި ސަރުކާރުގެ ޚާއްޞަ މެހެމާނެއްގެ ގޮތުގައި ކުރެއްވި ދަތުރުފުޅެކެވެ. މި ދަތުރުފުޅުގެ ތެރެއިން ޑރ. ޚަލީލުއްރަޙްމާން ވަނީ ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަރިހަށް އިޙްތިރާމްގެ ޒިޔާރަތެއް ކުރައްވާފައެވެ. އަދި ފޮރިން މިނިސްޓަރު އިރުތިޝާމް އާދަމްއާއެކު ބޭއްވެވި ރަސްމީ ބައްދަލުވުމުގައި، ދެ ޤައުމުގެ ދެމެދުގައި ޒަމާނުއްސުރެ އޮންނަ ގާތް އެކުވެރި ގުޅުން އިތުރަށް ހަރުދަނާކުރުމާ ގުޅޭގޮތުން ފުޅާ ދާއިރާއެއްގައި ވަނީ މަޝްވަރާކުރައްވާފައެވެ.
ދެ ވަޒީރުންގެ މެދުގައި ކުރެވުނު މުހިންމު މަޝްވަރާތަކުގައި މައިގަނޑު ގޮތެއްގައި އަލިއަޅުވާލައްވާފައިވަނީ ޞިއްޙީ، ތަޢުލީމީ، ދަނޑުވެރިކަން، މުޢާޞަލާތީގުޅުން، ފަތުރުވެރިކަން، ލޭބަރ، ވިޔަފާރި އާއި އިންވެސްޓްމަންޓްގެ ދާއިރާއިން ގުޅުން ބަދަހިކުރުމަށެވެ. މީގެ އިތުރުން އިންސާނީ ވަސީލަތްތައް ތަރައްޤީ ކުރުމާއި، ދެ ޤައުމުގެ ރައްޔިތުންގެ މެދުގައި އޮންނަ އެކުވެރި ގުޅުން އިތުރަށް ފުޅާކުރުމަށްވެސް ވަނީ ޚިޔާލު ބަދަލުކުރައްވާފައެވެ. ދެކުނު އޭޝިއާ ސަރަޙައްދުގެ އިޤްތިޞާދީ އަދި އިޖުތިމާޢީ ކުރިއެރުމަށް ދެ ޤައުމުގެ ގުޅުން މުހިންމު ދައުރެއް އަދާކުރާއިރު، މި ބައްދަލުވުންތަކުގެ ސަބަބުން ބައިނަލްއަޤްވާމީ މައިދާނުގައިވެސް ދެ ޤައުމުގެ އެއްބާރުލުން އިތުރުވެގެންދާނެކަމަށް ބެލެވެއެވެ.
މި ދަތުރުފުޅުގައި ޑރ. ޚަލީލުއްރަޙްމާން ވަނީ ދިވެހި ސަރުކާރުގެ ތިމާވެށީގެ މުހިންމު ސިޔާސަތެއް ކަމަށްވާ ރައީސް މުޢިއްޒު އިފްތިތާޙު ކޮށްދެއްވި “ފަސް މިލިއަން ގަސް އިންދުމުގެ ޕްރޮގްރާމް” ގައި ވެސް ބައިވެރިވެވަޑައިގެންފައެވެ. މިގޮތުން އެ މަނިކުފާނު ވަނީ ލޮނުޒިޔާރަތް ޕާކުގައި ގަހެއް އިންދަވައިދެއްވާފައެވެ. މި ތާރީޚީ ދަތުރުފުޅުގެ ސަބަބުން ރާއްޖެއާއި ބަންގްލަދޭޝްއާ ދެމެދު އޮންނަ ޚާރިޖީ އަދި ސިޔާސީ ގުޅުން އާ ހަރުފަތަކަށް ކުރިއަރައިގެން ގޮސްފައިވާކަމަށް ދިވެހިރާއްޖޭގެ ފޮރިން މިނިސްޓްރީން ވަނީ ހާމަކޮށްފައެވެ.
ކިޔުންތެރިންގެ ހިޔާލު