ގދ. ފަރެސްމާތޮޑާ ކައިރީގައި އޮތް ފަޅު ރަށަކުން އިއްޔެ ގަވާއިދާ ޚިލާފަށް ވެލި ނަގަމުންދިޔަ ބަޔަކު އެ ރަށު ކައުންސިލުން ހުއްޓުވައި، ނެގި ވެލި ބަސްތާތައް އަނބުރާ އެ ރަށަށް ހުސްކުރުވައިފިއެވެ. މިއީ ރަށްގިރުމުގެ މައްސަލަ ބޮޑުވެފައިވާ ސަރަހައްދެއްގައި ގުދުރަތީ ވެށި ހިމާޔަތްކުރުމަށް ކައުންސިލުން އެޅި ހަރުދަނާ ފިޔަވަޅެކެވެ.
ފަރެސްމާތޮޑާ ކައުންސިލުން މީސްމީޑިއާގައި އާންމުކޮށްފައިވާ ވީޑިއޯއަކުން ފެންނަ ގޮތުގައި، ތިން މީހުން ތިބި ދޯންޏަކުން ވަނީ އެ މީހުން ނަގާފައިވާ ވެލި ބަސްތާތައް އަނބުރާ ގޮނޑުދޮށަށް އަޅާފައެވެ. އެ ކައުންސިލުން ބުނެފައިވަނީ ފަޅުރަށްތަކުން ވެލި ނެގުމަކީ ގާނޫނީ ގޮތުން މަނާ ކަމަކަށްވާއިރު، ރަށްތައް ހިމާޔަތްކުރުމުގައި އާންމުންގެ އެއްބާރުލުން ބޭނުންވާ ކަމަށެވެ. މިއީ ސީދާ އެ ރަށަށް ނިސްބަތްވާ ދޯންޏަކުން ކުރަމުންދިޔަ ކަމެއްކަން، ކައުންސިލުން ސަރަހައްދު ބެލެހެއްޓުމަށް ކުރަމުންދާ މަސައްކަތުގެ ތެރެއިން ވަނީ ފާހަގަކުރެވިފައެވެ.
ފަރެސްމާތޮޑާ ކައުންސިލްގެ ރައީސް މުހައްމަދު ސަބާހު ވިދާޅުވި ގޮތުގައި، އެ ރަށާ ކައިރީގައި މީގެ ކުރިން ތިން ފަޅު ރަށެއް އޮތް ނަމަވެސް، މެދުކެނޑުމެއްނެތި ވެލި ނެގުމުގެ ސަބަބުން އޭގެ ތެރެއިން އެއް ރަށް މިހާރު ވަނީ މުޅިން ނެތިގޮސްފައެވެ. އަދި ބާކީ އޮތް ރަށްތަކުން ވެސް ގަވާއިދާ ޚިލާފަށް ވެލި ނަގަމުންދާތީ އެކަމުގެ ކަންބޮޑުވުން އޭނާ ފާޅުކުރެއްވިއެވެ. މުސްތަގުބަލުގެ ޖީލުތަކަށް އެ ރަށްތައް ފޯރުކޮށްދިނުމަކީ ކޮންމެހެން ކުރަންޖެހޭ ކަމެއް ކަމަށާއި، ގާނޫނުތައް ނަގަހައްޓައި ތަންފީޒުކުރުމަކީ ކައުންސިލްގެ މައްޗަށް ލާޒިމުކަމެއް ކަމަށް އޭނާ ވިދާޅުވިއެވެ.
ވެލި ނެގުމަށް ޚާއްސަ ހުއްދަ ދީފައިވާ ސަރަހައްދުތަކެއް ކަނޑައެޅިފައި އޮތް ނަމަވެސް، ބައެއް ފަރާތްތަކުން ގާނޫނާ ޚިލާފަށް އަމަލުކުރަމުންދާތީ އެކަން ނުކުރުމަށް ކައުންސިލުން މީގެ ކުރިންވެސް ވަނީ އަންގާފައެވެ. ރާއްޖޭގެ ފަޅު ރަށްރަށާ ބެހޭ ގާނޫނުގެ ދަށުން އެކުލަވާލައިފައިވާ ގަވާއިދު ބަޔާންކުރާ ގޮތުގައި، ޚާއްސަ ހުއްދައެއް ނެތި ފަޅު ރަށްރަށުގެ ގޮނޑުދޮށުން ވެލި ނެގުމަކީ މަނާކަމެކެވެ. އެހެންނަމަވެސް، އެކި ބޭނުންތަކަށް ރަށްރަށުގެ ގޮނޑުދޮށުން ވެލި ނެގުމަކީ ޒަމާނުއްސުރެ ރާއްޖޭގައި އާންމުކޮށް ކުރަމުން އަންނަ ކަމަކަށް ވުމާއެކު، މިފަދަ ކަންކަން ތަކުރާރު ނުވާނެ ކަމުގެ އުއްމީދު އޮތް ކަމަށް ކައުންސިލްގެ ރައީސް ވަނީ ވިދާޅުވެފައެވެ.
ކިޔުންތެރިންގެ ހިޔާލު