ހުޅުމާލޭގައި މާލޭ ކޯޓު ކޮމްޕްލެކްސް އިމާރާތްކުރުމުގެ މަޝްރޫޢު ތަންފީޒުކުރުމަށްޓަކައި، މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ދެމެދު ރަސްމީ އެއްބަސްވުމެއްގައި ސޮއިކޮށްފިއެވެ.
ޝަރުޢީ ދާއިރާގެ މަސައްކަތްތައް ޒަމާނީ ފެންވަރަށް ތަރައްޤީކޮށް، ޚިދުމަތްތައް ހަރުދަނާކުރުމަށް ކުރިއަށްގެންދާ މި މަޝްރޫޢަކީ ސަރުކާރުން އިސްކަންދޭ މުހިންމު މަޝްރޫޢެކެވެ.
މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރ އުސްތާޛު ޔޫސުފް ޢަބްދުލްޣަފޫރެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ، ރިޓަޔަރޑް ޑެޕިއުޓީ ކޮމިޝަނަރ އޮފް ޕޮލިސް އަޙްމަދު ސައުދީއެވެ.
މި މަޝްރޫޢުގެ މައިގަނޑު މަޤްޞަދަކީ މާލޭގައި ހިންގަމުންދާ ކޯޓުތަކަށް ދިމާވެފައިވާ ޖާގައިގެ ދަތިކަމަށް ދާއިމީ ހައްލެއް ހޯދައިދިނުމެވެ. މިހާރު އެކި ތަންތަނުގައި ކުއްޔަށް ހިފައިގެންނާއި، ޖާގަ ކުޑަ ބައެއް އިމާރާތްތަކުގައި ހިންގަމުންދާ ކޯޓުތައް މި ކޮމްޕްލެކްސްއާއެކު އެއް ފުރާޅެއްގެ ދަށަށް ގެނެވޭނެއެވެ. މިއީ ޝަރީޢަތްތައް ހިންގުމުގައްޔާއި އާންމުންނަށް ޚިދުމަތް ދިނުމުގައި މިހާރު ދިމާވާ ގޮންޖެހުންތަކަށް ލިބޭނެ ބޮޑު ލުޔެއް ކަމަށް ސަރުކާރުން ފާހަގަކުރެއެވެ.
ރާއްޖޭގެ އުމްރާނީ ތަރައްޤީގެ ގިނަ މަޝްރޫޢުތަކެއް ކާމިޔާބުކަމާއެކު ނިންމަމުން އަންނަ އެމްޓީސީސީން ބުނެފައިވަނީ، މި މަޝްރޫޢުވެސް ކަނޑައެޅިފައިވާ މުއްދަތުގެ ތެރޭގައި ފެންވަރު ރަނގަޅުކޮށް ނިންމާލެވޭނެ ކަމުގެ ޔަޤީންކަން އެބައޮތް ކަމަށެވެ. މި މަސައްކަތުގެ ސަބަބުން ދިވެހިރާއްޖޭގެ ޢަދުލު އިންޞާފުގެ ނިޒާމު އިތުރަށް ހަރުދަނާވެ، ރައްޔިތުންނަށް އަވަސް އަދި ފަސޭހަ ޚިދުމަތްތަކެއް ލިބުމަށް މަގުފަހިވެގެންދާނެއެވެ.
ކޯޓުތަކަށް ދިމާވެފައިވާ ޖާގައިގެ މައްސަލަ ހައްލުކޮށްދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މީގެކުރިން ވަނީ ދެއްވާފައެވެ. މި މަޝްރޫޢަކީ އެ ވައުދު ފުއްދުމުގެ ގޮތުން އެޅޭ މުހިންމު ފިޔަވަޅެކެވެ.
ކިޔުންތެރިންގެ ހިޔާލު