މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ޒަމާނީ ފެންވަރަށް ތަރައްޤީކޮށްފައިވާ ބޮޑުތަކުރުފާނު މަގުގެ އާ ސަރަހައްދު މިއަދު ހަވީރު 4:00 ގައި އާންމުންނަށް ހުޅުވާލައިފިއެވެ. ހަތަރު ލޭނަށް ފުޅާކޮށް ހެންވޭރު ފެރީ ޓާމިނަލުން ފެށިގެން އިއްޒުއްދީން ފާލަމާ ހަމައަށް ހަދާފައިވާ މި ސަރަހައްދު ހުޅުވާލީ އުޅަނދުފަހަރަށް ފަސޭހައިން ދަތުރުކުރެވޭނެ ހިތްފަސޭހަ މާޙައުލެއް ޤާއިމުކުރުމުގެ މަޤުޞަދުގައެވެ.
އެމްޓީސީސީން މަޢުލޫމާތު ދީފައިވާ ގޮތުގައި، 700 މީޓަރަށް މި މަގު ފުޅާކުރުމަށްފަހު ހުޅުވާލިއިރު، މަގު ފެހިކުރުމުގެ ގޮތުން ގިނަ އަދަދެއްގެ ރުކާއި ގަސް ވަނީ އިންދާފައެވެ. އަދި މަގު އާންމުންނަށް ހުޅުވާލި ނަމަވެސް، މަޝްރޫޢާ ގުޅުންހުރި ކުދިކުދި ބައެއް މަސައްކަތްތައް ކުރިއަށްދާނެކަމަށް އެ ކުންފުނިން ބުނެފައިވެއެވެ. މި މަޝްރޫޢުގެ ދަށުން ނޯތު ހާބަރު ސަރަހައްދުން ފެށިގެން ރަސްމީ ފާލަމާ ދެމެދު ތާރު އަޅައިގެން މަގު ހެދީ ފަޅުތެރެއިން ބައެއް ހިއްކައިގެންނެވެ. ހެންވޭރު ފެރީ ޓާމިނަލް ސަރަހައްދުން ފަށައިގެން މަގު ފުޅާކޮށް ތާރު އެޅުމުގެ އަމަލީ މަސައްކަތް ފެށީ މީގެ ތިން މަހެއްހާ ދުވަސް ކުރިންނެވެ.
އަލަށް ހެދި ބައިގައި އުޅަނދުފަހަރު ޕާކުކުރުން މަނާކޮށްފައިވާއިރު، ޕާކުކުރުމުގެ މައްސަލައަށް ޙައްލެއް ގެނައުމަށްޓަކައި ބޭންކް އޮފް މޯލްޑިވްސް ކުރިމަތީގައި ވަނީ 500 ޖާގައިގެ ޚާއްޞަ ޕާކިންގ ޒޯނެއް ތަރައްޤީކޮށްފައެވެ. މިއީ އެއްފަހަރާ ފަސްސަތޭކަ ސައިކަލަށް ޕާކުކުރެވޭނެ ޖާގަ ތަނަވަސް ސަރަހައްދެކެވެ. ސަރުކާރުން މި މަގު ތަރައްޤީކުރުމަށް އަމާޒުހިފާފައިވަނީ ޖާގަ ތަނަވަސް، ރާއްޖޭގެ ޤުދުރަތީ ރީތިކަން ފެންނަ ހިތްފަސޭހަ މާޙައުލެއް ޤާއިމުކުރުމަށެވެ.
ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ ދަށުން ކުރިއަށް އޮތް މަރުޙަލާގައި ހެދުމަށް ހަމަޖެހިފައިވަނީ މޯލްޑިވްސް ޕޯޓްސް ލިމިޓެޑް (އެމްޕީއެލް) ސަރަހައްދުން ފެށިގެން ވެސްޓް ޕާކާ ހަމައަށް އޮތް ބައެވެ. މި ސަރަހައްދުގެ މަސައްކަތް ނިމުމުން، ބޮޑުތަކުރުފާނު މަގުގެ ބާކީ އޮތް ބައި ވެސް ޒަމާނީ ފެންވަރަށް ތަރައްޤީކުރުމުގެ މަސައްކަތް ކުރިއަށް ގެންދާނެކަމަށް ކަމާބެހޭ ފަރާތްތަކުން ވަނީ ހާމަކޮށްފައެވެ.
ކިޔުންތެރިންގެ ހިޔާލު