ބޮޑުތަކުރުފާނު މަގުގެ އަލަށް ތަރައްޤީކުރި ސަރަހައްދު މިއަދު އާންމުންނަށް ހުޅުވާލުމަށް އެމްޓީސީސީން ނިންމައިފިއެވެ.
އެމްޓީސީސީން ބުނީ ހެންވޭރު ފެރީ ޓާމިނަލުން ފެށިގެން އިއްޒުއްދީން ފާލަމާ ހަމައަށް ހަތަރު ލޭނަށް ފުޅާކޮށް ތަރައްޤީކޮށްފައިވާ ސަރަހައްދު މިއަދުގެ ހަވީރު އާންމުނަށް ހުޅުވާލާނެކަމަށެވެ. އަދި މަގު ހުޅުވާލިނަމަވެސް ބައެއް ކުދިކުދި ކަންކަން ކުރިއަށްދާނެކަމަށް އެމްޓީސީސީން ބުންޏެވެ. 700 މީޓަރަށް މަގު ފުޅާކުރުމަށްފަހު ހުޅުވާލާއިރު، އެ މަގު ވަނީ ޒަމާނީ ފެންވަރަށް ތަރައްޤީކޮށް، ފެހިކުރުމަށް ރުކާއި ގަސް އިންދާފައެވެ.
ބޮޑުތަކުރުފާނު މަގު ފުޅާކުރުމުގެ މި މަޝްރޫއަކީ ފަޅުން ބައެއް ހިއްކައިގެން، ހަތަރު ލޭނަށް ދުއްވޭ ގޮތަށް ކުރިއަށްގެންދާ މަޝްރޫއެކެވެ. މިދިޔަ އަހަރުގެ އޯގަސްޓް މަހު ފެށި މި މަސައްކަތުގެ ދަށުން މިހާރު ވަނީ ތާރު އަޅައި ނިންމާލައި، 500 ސައިކަލް ޕާކުކުރެވޭ ޖާގައެއްވެސް ފަޅު ހިއްކައިގެން ތަރައްގީ ކޮށްފައެވެ. އަދި މި ސަރަހައްދު ޒަމާނީ ފެންވަރަށް ތަރައްގީ ކުރުމުގެ އަމަލީ މަސައްކަތް ފެށި މާޗު 23 އިން ފެށިގެން ހަތަރު މަހެއްހާ ދުވަހުގެ ތެރޭގައި މަގު އާންމުކޮށް ހުޅުވާލުމުގެ ފަހު ތައްޔާރީތައް ދަނީ ވަމުންނެވެ.
ސަރުކާރުން އަމާޒު ހިފާފައިވަނީ މި މަހުގެ 26 ވަނަ ދުވަހު މި މަގު ހުޅުވުމަށެވެ. ބޭނުމަކީ އެއްގަމު އުޅަނދު ފަހަރު ފަސޭހަކަމާއެކު ދުއްވޭ، ޖާގަ ތަނަވަސް، ރާއްޖޭގެ ގުދުރަތީ ރީތިކަން ފެންނަ ހިތްފަސޭހަ މާހައުލެއް ގާއިމުކުރުމެވެ.
ކިޔުންތެރިންގެ ހިޔާލު