ސައިންޓިފިކް ގޮތުން ސާބިތުނުވާ، ބަރުދަން ލުއިކޮށްދޭ ކަމަށް ބުނާ އުފެއްދުންތައް އިޝްތިހާރުކުރާ ފަރާތްތަކާ މެދު ގާނޫނީ ފިޔަވަޅު އަޅާނެ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފިއެވެ. އެ އިދާރާއިން ނެރުނު ބަޔާނެއްގައި ބުނެފައިވަނީ، ބަލިތަކަށް ފަރުވާއެއް ނުވަތަ ހަށިގަނޑަށް ބޮޑެތި ބަދަލުތަކެއް ގެނެސްދޭ ކަމަށް ދޭހަވާ ގޮތަށް ރާއްޖޭގައި އުފެއްދުންތައް އިޝްތިހާރުކުރަމުންދާކަން ފާހަގަކުރެވިފައިވާ ކަމަށެވެ.
އެމްއެފްޑީއޭއިން ބުނި ގޮތުގައި، ސައިންޓިފިކް ދިރާސާއެއްގެ މައްޗަށް ބިނާނުކޮށް ސާބިތުނުހިފޭ މައުލޫމާތު ހިމަނައިގެން ތަކެތި މާކެޓުކުރުމަކީ ބޭނުންކުރާ ފަރާތްތަކަށް މައުލޫމާތު އޮޅި، ސިއްހަތަށް ނޭދެވޭ އަސަރުކުރުމުގެ ފުރުސަތު އޮތް ކަމެކެވެ. ޚާއްސަކޮށް ދާއިމީ ބަލިތަކަށް ބޭސްކުރާ މީހުންނާއި، މާބަނޑު މީހުން އަދި ގާތުން ކިރުދޭ މީހުންނަށް މީގެ ސަބަބުން ބޮޑެތި ނުރައްކާތަކެއް ކުރިމަތިވެދާނެ ކަމަށް އެ އޮތޯރިޓީން އިންޒާރު ދެއެވެ.
ކާބޯތަކެތި އިޝްތިހާރުކުރުމާ ބެހޭ ގަވައިދާ ހަވާލާދީ އެމްއެފްޑީއޭއިން ބުނީ، ކާބޯތަކެއްޗަކީ ވަކި ފެންވަރެއްގެ ނުވަތަ ހާއްސަ ސިފައެއްގެ އެއްޗެއްކަމަށް ދޭހަވާގޮތަށް ހަގީގަތާ ހިލާފަށް އިޝްތިހާރުކުރުމަކީ މަނާކަމެއް ކަމަށެވެ. އެކި މަންސަތަކުގައި އުފެއްދުންތައް ކުރިއެރުވުމަށް ދައުރުކުރާ މައުލޫމާތުތަކަކީ ވެސް އިޝްތިހާރުގެ ގޮތުގައި ބެލެވޭނެ ކަމަށް އެ އިދާރާއިން ކަނޑައަޅާފައިވެއެވެ.
އެ އޮތޯރިޓީން ވަނީ ސާބިތުނުހިފޭ މައުލޫމާތު ހިމެނޭ އުފެއްދުންތަކަށް ބަރޯސާވުމުގެ ބަދަލުގައި، ދުޅަހެޔޮ ސިއްހަތެއްގައި ހުރުމަށްޓަކައި މިންހެޔޮކޮށް ކެއުމަށާއި، ކެއުމުގައި ލޮނާއި ހަކުރު މަދުކުރުމަށް އިލްތިމާސްކޮށްފައެވެ. އަދި އާދަވެގެން ކަސްރަތުކުރުމަކީ ސިއްހަތަށް އެންމެ ފައިދާހުރި ގޮތް ކަމުގައިވެސް އެމްއެފްޑީއޭއިން ވަނީ ފާހަގަކޮށްފައެވެ.
ކިޔުންތެރިންގެ ހިޔާލު