ކ. ހިންމަފުށީގައި މިދިޔަ އާދީއްތަ ދުވަހުގެ ރޭ ހިންގި މާރާމާރީއެއްގެ މައްސަލައިގައި ހައްޔަރުކުރި މިސްރަށް ނިސްބަތްވާ ދެ މީހުން އަނބުރާ ރާއްޖެ ނާދެވޭ ގޮތަށް ޑީޕޯޓުކޮށްލުމަށް ދިވެހި ފުލުހުންގެ ޚިދުމަތުން ނިންމައިފިއެވެ.
ފުލުހުންގެ އިދާރާއިން މައުލޫމާތު ދީފައިވާ ގޮތުގައި މި މާރާމާރީގެ މައްސަލަ އެ އިދާރާއަށް ރިޕޯޓުކޮށްފައިވަނީ އާދިއްތަ ދުވަހުގެ ރޭ 1924 ހާއިރުއެވެ. މި މައްސަލައާ ގުޅިގެން ހައްޔަރުކުރި މިސްރުގެ ދެ ރައްޔިތުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ތަހުގީގު ކުރިއަށްގެންދިއުމަށްޓަކައި އެ ދެ މީހުން ދެ ދުވަހުގެ މުއްދަތަށް ބަންދުގައި ބޭތިއްބުމަށް ކޯޓުން ވަނީ އަމުރުކޮށްފައެވެ.
މި މައްސަލައިގެ ތަހުގީގުގެ ތެރެއިން ހޯދުނު ހޯދުންތަކަށް ރިއާޔަތްކުރުމަށްފަހު، ތުހުމަތުކުރެވޭ ދެ މީހުން ރާއްޖެއިން ފުރުވާލުމަށް ފުލުހުން ވަނީ ނިންމާފައެވެ. އަދި އެ މީހުން ފުރުވާލުމަށްފަހު އަނބުރާ ރާއްޖެއަށް އެތެރެނުވެވޭނެ ގޮތް ހެދުމަށް މޯލްޑިވްސް އިމިގްރޭޝަނަށް މިހާރު ހުށަހަޅާފައިވާނެ ކަމަށްވެސް ފުލުހުން ވަނީ ބުނެފައެވެ.
މި ހާދިސާއާ ގުޅިގެން ސުވާލުކުރަންޖެހޭ ފަރާތްތަކާ ސުވާލުކޮށް، ބަލަންޖެހޭ ކަންކަން މިހާރު ބަލާފައިވާ ކަމަށް ފުލުހުން މައުލޫމާތުދެއެވެ. ނަމަވެސް، މި މާރާމާރީ ހިނގަން މެދުވެރިވި ސަބަބެއް މިހާތަނަށް ފުލުހުން ހާމަކޮށްފައެއް ނުވެއެވެ. މިއާއެކު، ތަހުގީގުގެ މަރުހަލާގައި ފުރިހަމަކުރަންޖެހޭ އިޖުރާއަތްތައް ނިންމުމަށްފަހު، މި ދެ މީހުން ޑީޕޯޓުކުރުމުގެ މަސައްކަތް އިމިގްރޭޝަނާ ގުޅިގެން ކުރިއަށްދާނެއެވެ.
ކިޔުންތެރިންގެ ހިޔާލު