ހުޅުމާލޭގެ އަޒީޒާ މިސްކިތުގެ ދޮރުގެ ބިއްލޫރިގަނޑު ތަޅާލައި ގެއްލުންދިން މައްސަލައިގައި ތުހުމަތުކުރެވޭ މީހާގެ ހާލަތަށް ރިއާޔަތްކޮށް ފިޔަވަޅު އަޅަމުންދާ ކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.
ހުޅުމާލޭގެ ޗަނބޭލީ މަގުގައި ހުންނަ އަޒީޒާ މިސްކިތަށް ގެއްލުން ދީފައިވާ މައްސަލަ ފުލުހުންނަށް ރިޕޯޓުކޮށްފައިވަނީ އާދީއްތަ ދުވަހުގެ ރޭ 3:47 ހާއިރުއެވެ. މި ހާދިސާގައި އެ މިސްކިތަށް ވަންނަން ހުންނަ މައި ދޮރުގެ ދެ ދިމާއަކުން ބިއްލޫރިގަނޑު ވަނީ ތަޅައިގެންގޮސްފައެވެ. ފޮޓޯތަކުން ފެންނަ ގޮތުގައި މިކަމުގެ ސަބަބުން މިސްކިތުގެ ދޮރަށް ވަނީ ބޮޑެތި ގެއްލުންތަކެއް ލިބިފައެވެ.
މި މައްސަލައާ ގުޅިގެން ފުލުހުން އަންނަނީ ކަމާބެހޭ އެހެނިހެން އިދާރާތަކާ ގުޅިގެން ޚާއްސަ މަސައްކަތްތަކެއް ކުރަމުންނެވެ. ފުލުހުން ހާމަކޮށްފައިވާ ގޮތުގައި، މި އަމަލު ހިންގި ކަމަށް ތުހުމަތުކުރެވޭ ފަރާތުގެ ހާލަތަށް ރިއާޔަތްކޮށް، ގާނޫނީ ގޮތުން އަޅަންޖެހޭ ފިޔަވަޅުތައް އެޅުމުގެ މަސައްކަތް ދަނީ ކުރަމުންނެވެ.
މިފަދަ އަމަލުތަކަކީ މުޖުތަމައުގެ ހަމަޖެހުމާއި ދީނީ މުއައްސަސާތަކުގެ ހުރުމަތަށް އުނިކަން އަންނަ ކަންކަމަށް ވުމާއެކު، މިސްކިތުގެ ހުރުމަތާއި ރައްކާތެރިކަން ކަށަވަރުކުރުމަށް ފުލުހުން އަންނަނީ މަސައްކަތް ކުރަމުންނެވެ. އަދި މިފަދަ ކަންކަން ތަކުރާރުވިޔަ ނުދިނުމަށްޓަކައި އަޅަންޖެހޭ އެންމެހައި ސަލާމަތީ ފިޔަވަޅުތައް ކަމާބެހޭ މުއައްސަސާތަކާ ގުޅިގެން އަޅަމުންދާނެ ކަމަށް އެ އިދާރާއިން ބުނެފައިވެއެވެ.
ކިޔުންތެރިންގެ ހިޔާލު