މަގުމަތީގެ ސަލާމަތާއި ރައްކާތެރިކަން ކަށަވަރުކޮށް، އެކްސިޑެންޓުތައް މަދުކުރުމަށް ރައްޔިތުން ހޭލުންތެރިކުރުވުމުގެ ގޮތުން ހުޅުމާލޭގެ ފުލުހުން ޚާއްޞަ “ރޯޑްޝޯ” އެއް ބާއްވައިފިއެވެ.
ހުޅުމާލެ ޓްރެފިކް ފުލުހުން އިންތިޒާމުކޮށްގެން ކުރިއަށް ގެންދިޔަ މި ހަރަކާތުގެ މައިގަނޑު މަގުސަދަކީ މަގުތަކަކީ އެންމެނަށް އަމާން ރައްކާތެރި ތަނަކަށް ހެދުމެވެ. އަދި ބަދަހި، އަމާން މުޖުތަމައެއް ބިނާކުރުމަކީވެސް މި ހަރަކާތުގެ އަމާޒެކެވެ.
މި ހަރަކާތް ކުރިއަށް ގެންގޮސްފައިވަނީ ހުޅުމާލޭގެ ފޭސް އެކެއް އަދި ފޭސް ދެއެއްގެ އެކި ސަރަހައްދުތަކުގައެވެ. މި ހަރަކާތުގައި ހުޅުމާލެ ޕޮލިސް ކޮމާންޑުގެ ހެޑް، އެސިސްޓެންޓް ކޮމިޝަނަރ އޮފް ޕޮލިސް އާސިމް ޢަބްދުﷲ ވެސް ބައިވެރިވެވަޑައިގެންނެވިއެވެ.
ގިނަ އަދަދެއްގެ ފުލުހުން ބައިވެރިވި މި ހަރަކާތުގެ ތެރެއިން، މަގުމަތީގައި އުޅަނދު ދުއްވާ މީހުންނާއި ހިނގާބިނގާވެ އުޅޭ މީހުންނާ ބައްދަލުކޮށް ސަލާމަތީ މައުލޫމާތު ވަނީ ހިއްސާކޮށްފައެވެ.
އެގޮތުން، އުޅަނދު ދުއްވާއިރު ތިމާއާއި އަނެކުންގެ ރައްކާތެރިކަން ކަށަވަރުކުރުމަށް ކުރެވޭނެ ކަންކަމުގެ މައުލޫމާތު ކިޔައިދީފައިވެއެވެ. މީގެ އިތުރުން، ކަނޑައެޅިފައިވާ މިންގަނޑަށްވުރެ ބާރަށް އަދި ނުރައްކާތެރިކޮށް އުޅަނދު ނުދުއްވުމަށާއި މަގުހުރަސްކުރާ މީހުންނަށް އިސްކަންދިނުމަށް އިރުޝާދު ދީފައިވެއެވެ.
ހަމައެއާއެކު، ހިނގާބިނގާވެ އުޅޭ މީހުންވެސް ދުއްވާއެއްޗިއްސަށް ސަމާލުކަންދިނުމަށާއި މަގުހުރަސްކުރާއިރު ދެކޮޅު ބަލައި ރައްކާތެރިކަން ކަށަވަރުކުރުމަށް ފުލުހުން ވަނީ އިލްތިމާސްކޮށްފައެވެ.
ކިޔުންތެރިންގެ ހިޔާލު