ރާއްޖޭގެ އުތުރުގައި އެންވެރިކަމަށް ނުކުމެ އުޅުނު “ބަހުރު” ނަމަކަށް ކިޔާ މަސްދޯންޏަކުން ގެއްލުނު މީހަކު ހދ. ހޮނޑާފުށީ ގޮނޑުދޮށަށް ލައްގާފައި އޮއްވާ ފެނިއްޖެއެވެ.
އެމްއެންޑީއެފުން މައުލޫމާތު ދިން ގޮތުގައި މި ހާދިސާ ހިނގާފައިވަނީ ރިސޯޓެއް ހިންގަމުން އަންނަ ހދ. ހޮނޑާފުށީގެ ދެކުނު ފަރާތުގައި އެންވެރިކަން ކުރަން އޮތް ދޯންޏަކުންނެވެ. މި މީހާ ގެއްލިގެން އެމްއެންޑީއެފް ކޯސްޓްގާޑަށް ރިޕޯޓްކޮށްފައިވަނީ ރޭ ފަތިހު ހަތަރެއް ޖެހިފަހުންނެވެ. އަދި ރިޕޯޓް ލިބުމާއެކު ކޯސްޓްގާޑުން ވަނީ އޭނާ ހޯދުމުގެ މަސައްކަތް ފަށާފައެވެ.
ގެއްލުނު މީހާ ފެނިފައިވަނީ އޭނާ ހޯދުމުގެ މަސައްކަތުގައި ޑިންގީއެއްގައި ހަރަކާތްތެރިވަމުންދިޔަ ބަޔަކަށެވެ. އެމީހާ ފެނުނީ ހާދިސާގެ ރިޕޯޓް ލިބުނުތާ ގާތްގަނޑަކަށް ދެ ގަޑިއިރެއްހާއިރު ފަހުން، ހޮނޑާފުށީ ގޮނޑުދޮށަށް ލައްގާފައި އޮއްވައެވެ.
އޭނާއަށް އަވަސް ފަރުވާދިނުމަށްޓަކައި ވަގުތުން ހދ. ހަނިމާދޫ ސިއްހީ މަރުކަޒަށް ގެންދެވުނެވެ. އެ މަރުކަޒުން ދިން މައުލޫމާތާ ހަވާލާދީ އެމްއެންޑީއެފުން ބުނެފައިވަނީ ފަރުވާ ދިނުމަށްފަހު އޭނާގެ ހާލު މިހާރު ރަނގަޅު ކަމަށެވެ. ނަމަވެސް އެ މީހާއާ ގުޅޭ އިތުރު އެއްވެސް މައުލޫމާތެއް އެމްއެންޑީއެފުން ހާމަކޮށްފައެއް ނުވެއެވެ.
ކިޔުންތެރިންގެ ހިޔާލު