ބޯޑަރު ހުރަސްކޮށް ހިންގާ މާލީ ކުށްތަކާއި ސްކޭމްތަކާ ދެކޮޅަށް މަސައްކަތްކުރުމަށް ޖުލައި 20 އިން 21 އަށް ތައިލެންޑުގައި ބާއްވާ ބައިނަލްއަޤުވާމީ ސަމިޓެއްގައި ބައިވެރިވެވަޑައިގަތުމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ފުރާވަޑައިގެންފިއެވެ.
މި ސަމިޓަކީ އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އާއި ރޯޔަލް ތައި ޕޮލިސް ގުޅިގެން އިންތިޒާމުކޮށްގެން ބާއްވާ “ރީޖަނަލް ސަމިޓް އޮން ސްކޭމް ސެންޓަރ ކޮމްޕައުންޑްސް އެންޑް ޓްރާންސްނޭޝަނަލް އޯގަނައިޒްޑް ކްރައިމް” އެވެ. މޯލްޑިވްސް ޕޮލިސް ސަރވިސްއިން މަޢުލޫމާތު ދެއްވާގޮތުގައި، މި ދަތުރުފުޅުގެ މައިގަނޑު މަޤްޞަދަކީ ސަރަޙައްދީ އަދި ބައިނަލްއަޤުވާމީ ޤާނޫނު ތަންފީޛުކުރާ އިދާރާތަކާއެކު އޮންނަ ގުޅުން ބަދަހިކުރުމާއި، ބޯޑަރު ހުރަސްކޮށް ހިންގާ މާލީ ކުށްތަކާއި ސްކޭމް ސިންޑިކޭޓްތަކާ ދެކޮޅަށް ކުރާ މަސައްކަތުގައި އެއްބާރުލުން އިތުރުކުރުމެވެ. މީގެ އިތުރުން، މި ދާއިރާއިން ދިވެހި ފުލުހުންނަށް ބޭނުންވާ ފަންނީ ތަމްރީނުގެ އިތުރު ފުރުޞަތުތައް ހޯދުމަކީވެސް މި ދަތުރުފުޅުގެ އަމާޒެކެވެ.
އޭޝިއާ ޕެސިފިކް ސަރަޙައްދުގެ ޤާނޫނު ތަންފީޛުކުރާ އިދާރާތަކުގެ އިސްވެރިން ބައިވެރިވެވަޑައިގަންނަވާ މި ބައްދަލުވުމުގައި، ސްކޭމް ކޮމްޕައުންޑްތައް ހިންގާ ކުށްކުރާ ޖަމާޢަތްތަކާ ދެކޮޅަށް ގުޅިގެން މަސައްކަތްކުރާނެ އުސޫލުތަކާ ބެހޭގޮތުން ފުޅާ ދާއިރާއެއްގައި މަޝްވަރާކުރައްވާނެއެވެ. މިގޮތުން، އިޤްތިޞާދަށް ނޭދެވޭ އަސަރު ފޯރުވާ ސައިބަރ ފްރޯޑާއި، އިންސާނީ ވަގުފާރިއާއި، މަނީ ލޯންޑަރިންގ އަދި ރޭވުންތެރިކަމާއެކު ހިންގާ އެހެނިހެން ކުށްތައް ހުއްޓުވުމަށް އަޅަންޖެހޭ ފިޔަވަޅުތަކަށް އަލިއަޅުވާލާނެއެވެ. ހަމައެއާއެކު، ބައިވެރިންގެ މެދުގައި އިންޓެލިޖެންސް މަޢުލޫމާތު ބަދަލުކުރުމާއި، މާލީ ކުށްތައް ތަޙުޤީޤުކުރުމުގެ އެންމެ ހަރުދަނާ އުސޫލުތައް ހިއްސާކުރުމާއި، ބޯޑަރު ހުރަސްކޮށް އެއްބާރުލުން ދިނުމުގެ ނިޒާމުތައް ވަރުގަދަކުރުމަށް ވަނީ ނިންމާފައެވެ.
ދެކުނު އިރުމަތީ އޭޝިއާއަކީ ސިނާޢީ ފެންވަރުގައި ހިންގާ އޮންލައިން ސްކޭމްތަކާއި މާލީ ކުށްތަކުގެ މައި މަރުކަޒަކަށް ވެފައިވާއިރު، މިފަދަ ކުށްތަކުގެ ސަބަބުން ދުނިޔޭގެ އިޤްތިޞާދަށާއި ފަރުދުންގެ މާލީ ރައްކާތެރިކަމަށް ދަނީ ބޮޑެތި ގެއްލުންތަކެއް ލިބެމުންނެވެ. އިންވެސްޓްމަންޓް ސްކޭމްތަކާއި، ސައިބަރ މެދުވެރިކޮށް ހިންގާ މާލީ ކުށްތަކުން ރައްޔިތުން ސަލާމަތްކުރުމަށްޓަކައި، ކަމާބެހޭ ފަރާތްތަކުން ވަނީ ފާއިތުވި އަހަރުތަކުގައި ކުށްކުރާ ޖަމާޢަތްތައް ރޫޅާލުމަށް ގުޅިފައިވާ އޮޕަރޭޝަންތައް ވަރުގަދަކޮށްފައެވެ. މިފަދަ ވިއުގަތަކަކީ ޒަމާނީ މާލީ އަދި ޓެކްނޮލޮޖީގެ ވަސީލަތްތައް ބޭނުންކޮށްގެން ގިނަ ޤައުމުތަކަކަށް ފެތުރިފައިވާ ބަޔަކަށްވާތީ، މިއީ ގުޅިގެން މަސައްކަތްކުރުން ނުހަނު މުހިންމުވެފައިވާ ދާއިރާއެކެވެ.
ދިވެހިރާއްޖޭގެ އިޤްތިޞާދީ ނިޒާމު ޑިޖިޓަލްވަމުން އަންނަ މި ދަނޑިވަޅުގައި، މި ސަމިޓުގައި ބައިވެރިވުމަކީ ބައިނަލްއަޤުވާމީ އިދާރާތަކާއެކު އޮންނަ ގުޅުން ބަދަހިކުރުމަށާއި، ސައިބަރ ކުށްތަކާއި ބޯޑަރު ހުރަސްކޮށް ހިންގާ މާލީ ކުށްތައް ތަޙުޤީޤުކުރުމުގެ ޤާބިލުކަން އިތުރުކުރުމަށް ރާއްޖެއަށް ލިބޭ މުހިންމު ފުރުޞަތެކެވެ. މޯލްޑިވްސް ޕޮލިސް ސަރވިސްއިން ހާމަކުރައްވާފައިވާ ގޮތުގައި، މި ދަތުރުފުޅުގެ ސަބަބުން ފުލުހުންނަށް ބޭނުންވާ ޚާއްޞަ ތަމްރީނުތަކާއި ފަންނީ ކުރިއެރުން ހޯދުމަށް އާ މަގުތައް ފަހިވެ، އަލަށް އުފެދޭ ސަލާމަތީ އަދި މާލީ ނުރައްކާތަކަށް ފުރިހަމައަށް އިޖާބަދިނުމުގެ ޤާބިލުކަން އިތުރުވެގެންދާނެއެވެ.
ކިޔުންތެރިންގެ ހިޔާލު