މަގުމަތީގެ އުސޫލްތަކާއި ޓްރެފިކް ޤާނޫނާއި ޤަވާއިދުތަކަށް ތަކުރާރުކޮށް ޚިލާފުވާ ފަރާތްތަކާމެދު އެންމެ މަތީ ދަރަޖައިގައި” ހަރުކަށި ފިޔަވަޅުތައް ފުލުހުން އަޅަމުންދާނެކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ވިދާޅުވެއްޖެއެވެ.
ދާދި ފަހުން ވަނީ މާލޭ ސޯސަން މަގުގައި ނުރައްކާތެރިކޮށް ދުއްވި ސައިކަލަކުން ޖެހި ހިނގި އެކްސިޑެންޓުގައި ޒުވާން އަންހެނަކު ނިޔާވެފައެވެ.
މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކާ ތަކުރާރުކޮށް ޚިލާފުވާ ފަރާތްތަކާމެދު ހަރުކަށި ފިޔަވަޅު އެޅުމާ ގުޅޭގޮތުން ދެއްވި މެސެޖުގައި ޓްރެފިކްގެ އާއްމު އުސޫލްތަކަށާއި، އަދަބުތަކަށް ބޯނުލަނބާ މަދު ބައެއްގެ ސަބަބުން، ގިނަ ބައެއްގެ ހައްގުތައް ގެއްލި، ނުރައްކާތެރި އެކި ހާދިސާތައް ހިނގަމުންދާކަން ވަނީ ފާހަގަކުރައްވާފައެވެ. އެހެންކަމުން އެފަދަ އަމަލުތައް ހިންގާ ފަރާތްތަކާމެދު ހަރުކަށި ފިޔަވަޅު އަޅާނެކަމަށާއި، އެފަދަ ފަރާތްތަކަށް ފިޔަވަޅުއަޅަން އިދާރާތަކަށް އަންގަވާފައިވާނެކަމަށް ސީޕީ ވިދާޅުވިއެވެ. މިފަދަ ފިޔަވަޅުތައް އެޅުމުގެ މަޤްސަދަކީ މަގުތަކަކީ އެންމެންނަށް ރައްކާތެރިތަނަކަށް ހެދުންކަމަށް ސީޕީ ވިދާޅުވިއެވެ. އަދި ނުރައްކާތެރި ހާދިސާތައް ހުއްޓުވުމަކީވެސް މަޤްސަދެއްކަމަށް ސީޕީ ވިދާޅުވިއެވެ.
އެ ފިޔަވަޅުތައް އަޅާނީ ކަމާގުޅުންހުރި އިދާރާތަކުން ގުޅިގެންކަމަށާއި، މާލެ ސަރަހައްދުގެ އިތުރުން އަތޮޅުތެރޭގައި ވެސް މިފަދައިން ފިޔަވަޅުތައް އަޅާނެކަމަށް ސީޕީ ވިދާޅުވިއެވެ.
އަދި ފުލުހުން ކުރައްވާ މިފަދަ މަސައްކަތްތަކަށް އެންމެހާ ފަރާތްތަކުން އެއްބާރުލުން ދެއްވުމަށްވެސް ކޮމިޝަނަރ އޮފް ޕޮލިސް ވަނީ އިލްތިމާސްކުރައްވާފައެވެ.
ދާދިފަހުން ވަނީ ޤަވާއިދާ ިލާފަށް ދުއްވުމުގެ ގިނަ ނުރައްކާތެރި ހާދިސާތަކެއް ހިނގާފައެވެ.
ކިޔުންތެރިންގެ ހިޔާލު