ކޮމިޝަންޑް އޮފިސަރުންގެ ރޭންކުތަކާ ގުޅޭ ފުލުހުންނަކީ މުއައްސަސާއާއި ރައްޔިތުން އެދޭ ފަދަ ހަރުދަނާ ލީޑަރޝިޕެއް އަމަލީ މައިދާނުގައި ސާބިތުކޮށްދީ، ބޮޑެތި ޒިންމާތައް ފުރިހަމައަށް އުފުލޭނެ ބަޔަކަށް ވާންޖެހޭ ކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ވިދާޅުވެއްޖެއެވެ.
ކޮމިޝަނަރ މިހެން ވިދާޅުވީ، ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް (އެން.ސީ.ޕީ.އެލް.އީ) އިން ހިންގި 6 ވަނަ އިންސްޕެކްޓަރ ކޯސް ނިންމުމަށްޓަކައި މިއަދު އިސްކަންދަރު ބިލްޑިންގުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ. މި ކޯހުން އެއްވަނަ ހޯދާފައިވަނީ އަޙްމަދު ނަދީމެވެ.
މި ރަސްމިއްޔާތުގައި ވާހަކަފުޅު ދައްކަވަމުން ކޮމިޝަނަރ ފާހަގަކުރެއްވި ގޮތުގައި، 9 މޮޑިއުލްގެ މައްޗަށް އެކުލެވުނު މި ތަމްރީނު ފުރިހަމަކުރި 35 އޮފިސަރުންނަކީ ނަން-ކޮމިޝަންޑް ރޭންކުތަކުން ކޮމިޝަންޑް އޮފިސަރުންގެ ގިންތިއަށް ބަދަލުވުމުގެ މަރުހަލާ ނިންމައި، މުއައްސަސާގެ އިސް ލީޑަރޝިޕްގެ މަސްއޫލިއްޔަތުތަކާ ހަވާލުވުމަށް ތައްޔާރުވެފައިވާ އޮފިސަރުންނެވެ. އަދި މި ކޯހަކީ މުއައްސަސާގެ މުސްތަޤުބަލުގެ ލީޑަރުން ބިނާކުރުމަށް އެޅުނު މުހިންމު ފިޔަވަޅެއް ކަމަށްވެސް އެމަނިކުފާނު ވިދާޅުވިއެވެ.
ފުލުހުން ތަމްރީނުކުރުމަށް ކުރެވޭ ބޮޑެތި ހޭދަތަކާއި އިންވެސްޓްމަންޓްތަކަށް އަލިއަޅުއްވާލައްވަމުން ސީޕީ ވިދާޅުވީ، ރާއްޖެއިންނާއި ރާއްޖެއިން ބޭރުން ލިބޭ މިފަދަ ފުރުސަތުތަކުގެ ބޭނުން ހިފަންވާނީ މުއައްސަސާގައި ދެމިތިބެ ރައްޔިތުންނަށް އިޚްލާޞްތެރިކަމާއެކު ޚިދުމަތް ކުރުމުގެ މަތިވެރި ނިޔަތުގައި ކަމަށެވެ. މީގެއިތުރުން، ފުލުހުންގެ ވަޒީފާއަކީ ވަގުތީ ގޮތުން މަޑުކޮށްލާ ބަނދަރަކަށް ނުހަދައި، މުއައްސަސާގެ ފެންވަރު ހިފަހައްޓައިގެން ދިގު މުއްދަތަކަށް ޚިދުމަތުގައި ދެމިތިބުމަށް ހުރިހާ ފުލުހުންނަށް ކޮމިޝަނަރ އިލްތިމާސްކުރެއްވިއެވެ.
މުވައްޒަފުންގެ ޢިލްމާއި ހުނަރުގެ ފެންވަރު މަތިކުރުމަކީ ކޮންމެ ދުވަހަކުވެސް އިސްކަންދޭ ކަމެއްކަން ހާމަކުރައްވަމުން ސީޕީ އަޙްމަދު މުޙައްމަދު ވިދާޅުވީ، ދިވެހި ފުލުހުންގެ ޚިދުމަތް ވެގެންދާނީ ޢިލްމީ ގޮތުން ޤާބިލު، ހުނަރުވެރި، އަދި ރައްޔިތުންގެ އިތުބާރު ލިބިފައިވާ ތަޖުރިބާކާރު ބަޔަކު ތިބި މުއައްސަސާއަކަށް ކަމަށެވެ.
މި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީއާއި، އެން.ސީ.ޕީ.އެލް.އީގެ އެގްޒެކެޓިވް ޑިރެކްޓަރ އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޢަބްދުއްރަޙްމާންގެ އިތުރުން ފުލުހުންގެ ސީނިއަރ އޮފިސަރުންނާއި ދަސްވެނިވި އޮފިސަރުން ބައިވެރިވެވަޑައިގެންނެވިއެވެ.
ކިޔުންތެރިންގެ ހިޔާލު