މާލޭ ބޮޑުތަކުރުފާނު މަގު ތަރައްޤީކުރުމުގެ މަޝްރޫޢޫގެ ދަށުން އެމަގުގައި މިއަދު ތާރުއަޅައި ނިންމާލެވޭނެކަމަށް އެމްޓީސީސީން ބުނެފިއެވެ.
ހެންވޭރު އެމްޓީސީސީ ޓަރމިނަލުން ފެށިގެން ރަސްމީ ފާލަމާ ހަމައަށް ޒަމާނީ ފެންވަރަށް ތަރައްޤީކުރުމުގެ މަސައްކަތްފެށީ މާރިޗު މަހުގެ ތެރޭގައެވެ. މި މަޝްރޫޢުގެ މަސައްކަތުގެ ތެރެއިން ފެރީ ޓަރމިނަލުން ފެށިގެން ފޮރިން މިނިސްޓްރީއާ ހަމައަށް ތާރު އެޅުމުގެ މަސައްކަތް ޖުލައި މަހުގެ ތެރޭގައި ވަނީ ނިންމާލާފައެވެ. އަދި ފޮރިން މިނިސްޓްރީން ފެށިގެން ރަސްމީ ފާލަމާ ހަމައަށް ތާރު އެޅުމުގެ މަސައްކަތް އޭގެ ފެށިއެވެ. އެމްޓީސީސީން ބުނީ އެ މަޝްރޫއުގެ ދަށުން ސަބް ބޭސް މަސައްކަތްތަކާއި އޭބީސީ ލޭޔާގެ މަސައްކަތް އެއްކޮށް ނިމި، އެ ތަނުގައި ތާރު އެޅުމުގެ މަސައްކަތް މިއަދު އެއްކޮށް ނިމޭނެކަމަށެވެ.
ތާރު އެޅައި ނިމުނު ހިސާބުގައި މިހާރުވަނީ މަގުގެ ނިޝަންތައް ކުރަހާ ނިމިފައެވެ.
ބޮޑުތަކުރުފާނު މަގު ތަރައްޤީ ކުރުމުގެ މަޝްރޫޢަކީ، މާލޭގެ ޓްރެފިކް މައްސަލައަށް ދާއިމީ ޙައްލެއް ހޯދައިދިނުމަށް ކުރިއަށްގެންދާ މަޝްރޫޢެކެވެ. މި މަޝްރޫޢުގެ މަސައްކަތްތައް ޖޫންމަހަށް ނިންމުމަށް މަސައްކަތް ކުރިނަމަވެސް އެކި ސަބަބުތަކާ ހުރެ މުޅި މަޝްރޫޢުގެ މަސައްކަތް ނިމޭނެ ކަމަށް މިހާރު އެމްޓީސީސީން އަންދާޒާކޮށްފައިވަނީ މިމަހުގެ 26އަށެވެ.
މަގު ތަރައްޤީ ކުރުމުގެ މަޝްރޫޢުގެ ދަށުން، މީގެކުރިންވަނީ ޢިއްޒުއްދީން މަގުން ފެށިގެން ހެންވޭރު ޓަރމިނަލްއާއި ހަމައަށް ތާރުއަޅައިގެން ތަރައްޤީކޮށްފައެވެ. މިހާރު ކުރިއަށްގެންދާ މަސައްކަތްތަކާއެކު ހެންވޭރު ޓަމިނަލުން ފެށިގެން މާލޭ ނޯތު ހާބަރާއި ހަމައަށް ތަރައްޤީކޮށް ނިންމުމަށް ހަމަޖެހިފައިވެއެވެ.
ކިޔުންތެރިންގެ ހިޔާލު