ގަތަރުގެ އަމީރު، ޝެއިހް ތަމީމް ބިން ޙަމަދު އާލް ޘާނީ، ރައީސް ޑރ. މުހައްމަދު މުއިއްޒުއާ މިއަދު ބައްދަލުކުރައްވައިފިއެވެ.
މި ބައްދަލުވުމުގައި ރައީސް ޑރ. މުއިއްޒު ވަނީ، ގަތަރުގެ ކުރީގެ އަމީރު، ޝެއިހް ޙަމަދު ބިން ޚަލީފާ އާލް ޘާނީ އަވަހާރަވުމާ ގުޅިގެން، ދިވެހި ރައްޔިތުންގެ ނަމުގައި އާއި އެމަނިކުފާނުގެ އަމިއްލަފުޅު ނަންފުޅުގައި ތައުޒިޔާ ވިދާޅުވެފައެވެ.
މީގެ އިތުރުން ދެ ބޭފުޅުން ވަނީ، ދެ ގައުމުގެ ދެމެދުގައި އޮންނަ އުޚުއްވަތްތެރި ގުޅުމާ މެދު މަޝްވަރާކުރައްވައި، އެ ބަދަހި ގުޅުން އިތުރަށް ހަރުދަނާކުރުމުގެ އަޒުމު ދެ ގައުމުން ހިއްސާކުރާކަން ހާމަކުރައްވައިފައެވެ.
ރައީސް އޮފީހުން ވިދާޅުވި ގޮތުގައި ރައީސް ޑރ. މުއިއްޒުގެ މި ދަތުރުފުޅަކީ ގަތަރުގެ ކުރީގެ އަމީރު ރާއްޖެއަސް ދެއްވާފައިވާ ފާހަގަކޮށްލެވޭ އެހީތެރިކަމާއި އެއްބާރުލުން ރަމްޒުކޮށްދޭ ދަތުރުފުޅެކެވެ. ގަތަރުގެ ކުރީގެ އަމީރު ވަނީ ދެ ގައުމުގެ ގުޅުން ބަދަހި ކުރެއްވުމުގައި މުހިންމު ދައުރެއް އަދާކުރައްވައިފައެވެ.
މީގެ ތެރޭގައި، ގަތަރު އެއާވޭސްގެ ދަތުރުތައް ރާއްޖެއަށް ފެށުމާއި ލ. ގަމުގައި ޙަމަދު ބިން ޚަލީފާ އަލް ޘާނީ ސްކޫލު ގާއިމުކުރުމާއި ހުޅުމާލޭގައި މަސްޖިދުއްޝައިޚް ޤާސިމް ބިން އަލް ޘާނީ ބިނާކުރުން ހިމެނެއެވެ.
ކިޔުންތެރިންގެ ހިޔާލު