އިންޑިއާއިން ރާއްޖެއަށް އެތެރެކުރާ ތެލުގެ ބާވަތްތަކުން ނަގަމުންދިޔަ ޑިއުޓީ ކަނޑާލުމަށް އިންޑިއާ ސަރުކާރުން ނިންމައި، އެކަން އެ ޤައުމުގެ ގެޒެޓުގައި ޝާއިޢުކޮށްފިއެވެ. އިންޑިއާއިން ކަނޑާލަން ނިންމާފައިވަނީ ‘ސްޕެޝަލް އެޑިޝަނަލް އެކްސައިޒް ޑިއުޓީ’ އާއި ‘ރޯޑް އެންޑް އިންފްރާސްޓްރަކްޗަރ ސެސް’އެވެ.
ރާއްޖެއިން އާންމުކޮށް ތެލުގެ ބާވަތްތައް އެތެރެކުރަނީ މެދުއިރުމަތީގެ ޤައުމުތަކުންނެވެ. އެހެންނަމަވެސް، ޚުރުމޫޒް ކަނޑުއޮޅީގައި ކުރަމުންދާ ހަނގުރާމައާ ގުޅިގެން ދުނިޔޭގެ ހަކަތައިގެ ސިނާޢަތަށް ބުރުއަރާފައިވާ މި ދަނޑިވަޅުގައި، ރާއްޖެއިން ވަނީ އިންޑިއާއިން ތެޔޮގަތުމާ ގުޅޭގޮތުން މަޝްވަރާކޮށްފައެވެ. ރަސްމީކޮށް ސަރުކާރުން އަދި މިކަމުގައި ވަކި އެއްޗެއް ހާމަނުކުރި ނަމަވެސް، އިންޑިއާގެ ޑިއުޓީއާ ގުޅޭ ޤާނޫނަށް ގެނައި އިސްލާޙާއެކު، މި ލުއިތައް ލިބޭ ޤައުމުތަކުގެ ތެރޭގައި މިހާރު ރާއްޖެ ވަނީ ހިމަނާފައެވެ.
އިންޑިއާއިން މީގެކުރިން މިފަދަ ޑިއުޓީގެ ލުއިތައް ދެމުންދިޔައީ ސްރީލަންކާ، ބޫޓާން، ނޭޕާލް އަދި ބަންގްލަދޭޝް އަށެވެ. މިހާރު ރާއްޖެއަށް އެންމެ ގިނައިން ތެޔޮ އެތެރެކުރާ ޤައުމުތަކުގެ ތެރޭގައި ހިމެނެނީ އޮމާން، ސިންގަޕޫރު، މެލޭޝިއާ އަދި ޔޫއޭއީއެވެ.
ކިޔުންތެރިންގެ ހިޔާލު