ރުފިޔާ ކާޑު މެދުވެރިކޮށް ބޭރުގެ އޮންލައިން މުއާމަލާތްތަކަށް ބޭންކް އޮފް މޯލްޑިވްސް (ބީއެމްއެލް) އިން ދާދި ފަހުން އަޅާފައިވާ ލިމިޓްތަކަށް ލުއި ގެނެސްދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ މި ލުއިތަކުގެ ވަކި ތަފްސީލުތައް މި ހަފްތާގެ ފަހުކޮޅު ނުވަތަ އަންނަ ހަފްތާގެ ކުރީކޮޅު ބީއެމްއެލް އިން ރަސްމީކޮށް އިއުލާން ކުރާނެ ކަމަށެވެ.
ރައީސް ވަނީ މި ސަރުކާރުގެ ވެރިކަމުގައި ވަރަށް ގިނަ ބޭރުގެ ވިޔަފާރިތައް އާންމުން ކުރަމުންދާކަން ފާހަގަކުރައްވާފައެވެ.
އީ-ކޮމާސް މުއާމަލާތްތަކަށް މިހާރު ކަނޑައަޅާފައިވާ ލިމިޓްތަކަށް ހެޔޮ ބަދަލުތަކެއް ގެނައުމުގެ މަސައްކަތް ކުރަމުން އަންނަކަން ބީއެމްއެލްއިން މީގެ ކުރިން ވަނީ ފާހަގަކޮށްފައެވެ. އަދި މި ލުއިތަކުގެ ފައިދާ މި މަސް ނިމުމުގެ ކުރިން ކަސްޓަމަރުންނަށް ތަޖުރިބާ ކުރެވޭނެ ކަމަށް ވެސް ބޭންކުން ވަނީ ބުނެފަ އެވެ.
މިދިޔަ މަހުން ފެށިގެން ބީއެމްއެލް އިން ވަނީ ބޭރުގެ އީ-ކޮމާސް އާއި ދިވެހި ރުފިޔާ ކާޑު ބޭނުންކޮށްގެން ކުރާ އޮންލައިން މުއާމަލާތްތަބަދަލުތަކެއް ތަންފީޒުކޮށްފަ އެވެ. މި ގަވާއިދުގެ ދަށުން ބައިނަލްއަގްވާމީ އީ-ކޮމާސް ވެބްސައިޓްތަކުގައި ކަސްޓަމަރަކަށް ކުރެވޭނެ މުއާމަލާތްތަކުގެ ޖުމްލަ އަދަދު މަހަކު 30 މުއާމަލާތަށް ކަނޑައެޅިފައިވެ އެވެ.
ބީއެމްއެލް އިން މިހާރު އަމަލުކުރަމުންދާ ސިޔާސަތުގެ ދަށުން ރާއްޖެއިން ބޭރުގައި ޕޮއިންޓް އޮފް ސޭލް (ޕީއޯއެސް) ޓާމިނަލް މެދުވެރިކޮށް މަހަކު 1،000 ޑޮލަރާއި ހަމައަށް މުއާމަލާތް ކުރުމުގެ ހުއްދަ ލިބެ އެވެ. މީގެ އިތުރުން ބޭސްފަރުވާއާއި ތައުލީމާއި އެއާލައިން ޓިކެޓް ގަތުމާއި ހޮޓަލް ބުކިން ފަދަ ޒަރޫރީ ވަކި ހަރަދުތަކަށް މަހަކު 3،000 ޑޮލަރުގެ ލިމިޓެއް ކަނޑައަޅާފައިވެ އެވެ
ކިޔުންތެރިންގެ ހިޔާލު