ޒުވާން ޚަޠީބުންގެ ޢިލްމީ ފެންވަރު މަތިކޮށް، ދީނީ ދާއިރާއިން ކުރިއަށް ދިއުމަށް ހުރި ފުރުޞަތުތަކާ ގުޅޭގޮތުން އިސްލާމީ ކަންތައްތަކާ ބެހޭ ވުޒާރާއިން މާލެ ސަރަޙައްދުގައި ހުކުރުކުރާ ޒުވާން ޚަޠީބުންނާ މުހިންމު މަޝްވަރާތަކެއް ބާއްވައިފިއެވެ.
އިސްލާމީ ކަންތައްތަކާ ބެހޭ ވަޒީރު ޑޮކްޓަރ މުޙައްމަދު ޝަހީމް ޢަލީ ސަޢީދު ބައިވެރިވެވަޑައިގެންނެވި މި ބައްދަލުވުމުގައި، ކުރިއަށް އޮތް ޒުވާން ޚަޠީބުންގެ ޤައުމީ ކޮންފަރެންސާ ގުޅޭގޮތުންނާއި، ދީނީ ޢިލްމުގެ ދާއިރާއިން ޒުވާނުން ބިނާކުރުމަށް ގެންގުޅޭ ހަރުދަނާ ސިޔާސަތުތަކާ ބެހޭގޮތުން ފުޅާ ދާއިރާއެއްގައި މަޝްވަރާކުރެވުނެވެ. މި ބައްދަލުވުމުގެ މައިގަނޑު މަޤްޞަދަކީ ރާއްޖޭގައި އިސްލާމީ ކަންކަމުގައި އިސްނަގާނެ ފަރާތްތައް ވަރުގަދަކޮށް، މުސްތަޤުބަލުގައި ދީނީ ޢިލްމުވެރިންގެ ގޮތުގައި މަސައްކަތްކުރާނެ ޒުވާން ޖީލެއް ބިނާކުރުމެވެ.
މި މަޝްވަރާތަކުގައި އެންމެ މުހިންމު ކަމެއްގެ ގޮތުގައި ފާހަގަކުރެވުނީ، އިސްލާމީ ޢިލްމުގެ ދާއިރާއިން މަތީ ތަޢުލީމު ހާސިލުކުރަން ބޭނުންވާ ޒުވާން ޚަޠީބުންނަށް ޚާއްޞަ ތަޢުލީމީ ފުރުޞަތުތައް ފަހިކޮށްދިނުމެވެ. މިގޮތުން ޢަރަބި އަދި އިސްލާމީ ޤައުމުތަކުގެ ޖާމިޢާތަކާ ގުޅިގެން، ތަފާތު ދީނީ ރޮނގުތަކުން ތަޢުލީމު ހާސިލުކުރުމުގެ މަގު ފަހިކޮށްދިނުމަށް އެ ވުޒާރާއިން ދަނީ މަސައްކަތް ކުރަމުންނެވެ. އަދި ޚަޠީބުންގެ ގޮތުގައި މަސައްކަތްކުރާ ޒުވާނުންނަށް، ޚުޠުބާ ކިޔުމުގެ އިތުރުން މިސްކިތްތަކުގެ އިމާމުކަން ކުރުމުގެ ދާއިމީ ފުރުޞަތު ހޯދައިދިނުމާ ގުޅޭގޮތުން ވެސް ވާހަކަދެކެވުނެވެ. މިއީ ޒުވާން ޚަޠީބުން ދީނީ ޚިދުމަތުގައި ދެމިތިބުމަށް ހިތްވަރު ދިނުމަށާއި، މިސްކިތްތަކުގެ އިމާމުކަމުގެ މަޤާމަށް ޒުވާނުން ވެއްދުމަށް އެކުލަވައިލެވޭ ދެމެހެއްޓެނިވި ނިޒާމެއްގެ ދަށުން ކުރެވޭ މުހިންމު މަސައްކަތެކެވެ.
ސަރުކާރުގެ މި އިސްނެގުމަކީ ރާއްޖޭގެ އެކި ކަންކޮޅުތަކުގައި ދީނީ ޚިދުމަތްތައް ހަރުދަނާކޮށް، ފެންވަރު ހުރި ޢިލްމީ ޒުވާނުން ބިނާކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގެންގުޅުއްވާ ތަޞައްވުރުގެ ދަށުން ކުރިއަށްދާ މަސައްކަތެކެވެ. މީގެ ސަބަބުން ދިވެހި މުޖުތަމަޢުގައި ދީނީ ހޭލުންތެރިކަން އިތުރުވެ، ޒުވާން ޚަޠީބުންގެ ދައުރު އިތުރަށް ފުޅާވެގެންދާނެ ކަމަށް ވުޒާރާއިން ބަޔާންކުރެއެވެ.
ކިޔުންތެރިންގެ ހިޔާލު